Vawiin khan Parliamentary Secretary to Chief Minister Pu Lal Thanzara'n Chanmari YMA Hall-ah Tuipuiral Zirlai Pawl (TZP) Freshers Social a hmanpui.
Pu Lal Thanzara chuan Tuipuiral bial chu sorkarin a ngaih thah lova, an harsatna tawh hrang hrang te hriatpuiin sutkian dan a zawng mek a ni, a ti. Mipui te duhthusam leh beisei angin thawk leh khata engkim chinfel duak theih ni lo mahse sorkarin theihtawp chhuahin hma a la mek tih hre turin a chah a. Mizo mipuite chu Mizoram neitu an nih hriaa neitu diktak thinlung puin sorkar leh ram tana an theih ang tawk tih tuma, Mizoramin hma a sawn zel theihnan mahni theihna zawn theuhah tan la thar turin a fuih. Parliamentary Secretary chuan sorkarin Mizo thalaite hmakhaw ngaia zirna in tha, ram pawna zir theihna tur scholarship te leh infiamna khawvela hmanraw tha leh changkang ber ber a chhawp chhuah mek thu a sawi a. Heng avang hian hmuhtheihin thalaiten hma an sawn a, Football-ah phei chuan tun dinhmunah Mizo thalai 200 chuang tehmeuhin State pawn Club tha tak takah inkhelin an chhungte an chawm mek a ni, a ti.
PWD changtu Parliamentary Secretary Pu Lal Thanzara chuan Mizoram University kawng chhiat avanga harsatna thleng mek pawi a tih thu sawiin a siam that hna thawh mek chu fur ruahtui tla avanga a khaihlak thu te, Mizoram sorkar thuneihna nilo Food Corporation of India (FCI) kudam atanga truck lian buhfai phurin kawng a chil chhe nasa lutuk chu a chinfel dan ngaihtuah mek a nih thu a sawi a. Kawng siam hna pawh theih anga anga chhunzawmin a chhe zualpui siamthat tumin hma an la dawn a, Truck Driver te nen pawh indawrin a chinfel dan tur ngaihtuah leh rel mek a nih thu Pu Lal Thanzara chuan a tarlang bawk. Hetihlai hian ruahtui tam lutukin a tihchhiat leh ruahsur laia thawh theihloh chi hna te erawh a awm a ni tih hriatpui turin mipuite a ngen. Parliamentary Secretary chuan Mizoram hmun hrang hrangah mi thahnemngai ten kawngchhe siam hnatlang an thawk thin chu sorkar tana mualphona ni lovin, hnatlang thin hnam kan nih anga an hnatlang hi a Mizo an tih thu leh hnatlang te chu a theih ang angin PWD chuan motor leh lungte pea a tanpui zawk thin thu Pu Lal Thanzara hian a tarlang bawk.
Chawhnu lamah eizawnna kawnga zirlaite kaihhruaina programme hman niin hun hmangtu Pu Robert Thangmawia, OSD, H&TE chuan hlawhtling tura inbuatsaih thiam tur chuan tum mumal tak neia chhawr tlak leh hman tlak thiamna neih a tul, a ti.
TZP Freshers Social-ah hian an Senior Adviser leh bialtu MLA, kumin April ni 15 a boral ta, Pu B Lalthlengliana sunna hun an hmang a. An member Mizoram Hindi Prachar Sabha hnuaia Class XII exam-a pakhatna Nangkapliana leh Mizoram University degree exam-a BCom a pakhatna C Lallianzami te hnenah chawimawina thuziak an hlan a ni.
