Vawiin chawhma khan Aizawl Civil Hospital, Surgery OPD tualah Health & Family Welfare Minister Pu Lal Thanzara chuan Zenghri danna pek beihpui "Intensified Pulse Polio Immunization" a hawng.
Pu Lal Thanzara chuan Intensified Pulse Polio Immunization kaltlanga sawrkar laipuiin damdawi man to tak tak mipui tan a thlawna a pe chhuak chu a lawmawm takzet a, zenghri um bo tawh a rawn lan leh tawh lohna turin tan kan lak nasat a ngai a ni, a ti. Minister chuan naupang kum 5 chin hnuailam zawng zawngten zenghri danna an dawn theih nan leh Intensified Pulse Polio Immunization a hlawhtlin ngei theih nan mipui an pawimawh tih sawiin tha taka tawiawm turin a sawm a. Zenghri hi natna khirhkhan tak, piansualna hial thlentu anih avangin zenghri danna a hun taka lak hi kan ngai pawimawh em em tur a ni, a ti. Health Minister chuan Infant Mortality Rate (IMR) leh Maternal Mortality Rate (MMR) chungchang sawiin nau pianghlim leh nu nau chunga thi zat ti tlem turin Health Department-a thawktute leh mipui mimirin mawhphurna an nei a; nu naupai mekten mahni hriselna ngai pawimawha tha taka in enkawl tur leh ei leh in, zuk leh hmuama insum a, a hun taka doctor pan nachang hre thin turin a chah bawk.
He Intensified Pulse Polio Immunization hawnna programme kaihruaitu Dr. K. Lalbiakzuala, Mission Director, National Health Mission (NHM) chuan zenghri danna beihpui Pulse Polio Immunization chu kum 1995 khan India ramah a vawikhatna atan Delhi ah bul tan a nih hnuin India ram pumah he beihpui hi neih zui a ni, a ti a. India ram chu March 27, 2014 khan zenghri awm tohlo na ram (Polio Free Country) ah World Health Organization in puang tawh mah se, zenghri la awmna ram Pakistan, Afghanistan ten min hual a, zenghri virus la pai thei te nen kan in kal pawh reng avangin zenghri danna lak hi kan ngaih pawimawh a, naupang kum 5 hnuai lam mi ten an lak vek a tul a ni, a ti.
He programme-ah hian WHO-a Surveillance Medical Officer (SMO) Dr. Lalhlimpuii’n Technical Report chipchiar tak pe in zenghri do chu World Health Organization in a ngai pawimawh a, khawvel ram hrang hranga inkaidarh mai theih (Public Health Emergency of International Concern) ah a puan thu a sawi bawk.
