4017/2023-2024

2024 Ramtuk thla ni 29:  Vawiin khan ICAR Research Complex for NEH Region, Mizoram Centre, Kolasib chuan, ‘Awareness cum Agricultural Input distribution for livelihood improvement of tribal farmers’ programme chu  Krishi Vigyan Kendra, Kolasib nen tang kawp in KVK hmunah hman a ni a, he programme hi Tribal Sub Plan (TSP), Ministry of Agriculture and Farmers' Welfare, Government of India, hnuaia buatsaih a ni. He hunah hian, Pu Lalfamkima, Hon’ble Deputy Speaker of Mizoram Khuallian niin; Pu John L.T. Sanga, Deputy Commissioner, Kolasib chu Khualzahawm a ni.

Khuallian Pu Lalfamkima, Hon'ble Deputy Speaker  chuan ICAR nena hun rei tak ata an lo thawhhona a sawi a. Thlawh hma lak kawnga kan ramin hmasawnna a neih chu a ngaih pawimawh hmasak ber a nih thu a sawi a. Kuthnathawk tute tan a pawimawh ber chu thlai thar chauh nilovin, thlai chin atang a a hralhchhuah thleng hi a pawimawh takzet a ni tih a sawi a. Sawrkar thar hian kuthnathawk tute a ngai pawimawh em em a, hemi atan hian sawrkar in budget tha hnem tak a dah thu a tarlang a. Ei leh bar a kan intodelh theihna turin ICAR leh KVK te pawh hma la sauh sauh tur a a fuih rualin, kuthnathawktute pawhin rim tak leh tihtak zet a hnathawk a, ram thanna hnar ni turin a fuih bawk a ni.

Khawlzahawm Pu John L.T. Sanga, Bawrhsap, Kolasib chuan Mizoram mipui zing a za zel a 60 te hi agriculture hmang a eizawng te kan ni a ti a. Loneitute hi ei leh bar a intodelh nan a mi tangkai ber te an ni thu a sawi a. ICAR leh KVK ten he hun an buatsaih atang hian hlawk zawk a ran leh thlai tharchhuahna an chhar thar ngei a beisei thu a tarlang.

Dr. Sunil Doley, Head of Regional Centre, ICAR Research Complex for NEH Region, Mizoram Centre, Kolasib chuan he Awareness programme pawimawhna te,  Tribal Sub Plan hnuaia Mizoram loneitute tana ICAR hmalakna leh hlawhtlin tawh dan hrang hrangte a tarlang bawk a ni. “He programme in a tum ber chu agriculture leh a kaihhnawih lamah kuthnathawktuten technology thar leh thiam thil thar te an lo hriat theihna tur a buatsaih a ni” tiin, kuthnathawktute hi agriculture innghahna bulpui ber an ni a ti bawk.

He hun hawnna inkhawmah hian Dr. Michelle C. Lallawmkimi, Senior Scientist & Head, KVK, Kolasib chuan mi pawimawh leh chhimtute lawmna thusawiin, ICAR Mizoram Centre leh KVK Kolasib ten kuthnathawk tute tan hetiang hun an buatsaih hi a lawmawm a tih thu a sawi a, kuthnathawktute pawh in an chhawr tangkai ngei a beisei thu a tarlang bawk.

Dr. Lalhruaipuii, Senior Scientist & Co-Nodal Officer (Tribal Sub Plan), ICAR, Mizoram Centre, he Awareness programme-a Organizing Secretary ni bawk chuan kal khawmte hnena lawmthu sawina neiin he hun hi khar a ni.

He hun hawnna inkhawmah hian Loneitu mi 87 hnenah kuthnathawk tute tan a hmanrua tangkai te leh thlai chi, arnote, damdawi, len (net) leh thil dang engemaw zah sem niin Scientists, State officials leh Subject Matter Specialists hrang hrangte’n an telpui a. Loneitute tan Farmers’-Scientist interaction hun hawn a nih mai bak ah Free Plant and Animal Health Clinic pawh buatsaih niin, kuthnathawk tuten an chhawr tangkai hle. He hunah hian bank lampang atanga officials ten Agriculture lam kaihhnawiha Financial Literacy Campaign buatsaih a ni bawk.