Chief Secretary, Pu Lalmalsawma IAS chuan vawiin khan nihnih awh tur Digidhan Mela (Digital Payment Fair) chu Millenium Centre Rooftop a neih chu a hawng.
Pu Lalmalsawma chuan Digidhan Mela thil tum ber chu tangkafai hmang lova technology hmang tangkaia indawrtawn dan inzirtirna a nih thu sawiin November 2016 a India Sawrkar-in sum chheprel leh hlemhletna tih bo tumna kawngah Pawisa Note Rs.1000/500 tih thih in India ram chu cashless economy (Pawisa note hmang lova sumdawnna) a siamna atan hma lak mek anih thu leh he Mela pawh hi hemi ti hlawhtling tura hmanrua tangkai tak a nih a beisei thu a sawi a. India ram hmun hrang hrangah he Mela hi hman mek leh hman chhoh mek zel a nih thu sawiin Mizoramah pawh district hrang hrangah hetiang Mela hi neih tura ruahmanna duan mek a nih thu Chief Secretary chuan a sawi bawk a ni.
Digidhan Mela hawnna hi ICT Secretary, Pu C.Lalhmachhuana chuan kaihruaiin Mizoram dinhmun thlirin he Mela hman hi a pawimawh tih thu leh Digital Payment System (Tangkafai hmang lova indawrna) hman hlauhna te chu a tihkian ngei a beisei thu a sawi bawk a ni.
Digidhan Mela ah hian stall 60 awmin PAN Card, Aadhaar Card te siam theih a ni a. Bank 26 telin Bank Account awlsam taka hawn nghal theih a ni.
Mela hawnna programme ah hian Mizoram Merchants Association (MIMA) President, Pu P.C. Laldinthara chuan thu a sawi a, Dr. Lalthlamuana, Chief Informatics Officer ICT-in lawmthu sawina in a khar a ni.
