Information & Public Relations Department leh Mizoram Art Development Society (MADS) te tangkawp buatsaih Art Workshop 2015 chu vawiin khan Art Novelty, Chaltlang Venglaia Amawii Gallery-ah Pu Lalthangmawia Vandir, Dy. Director, I & PR in Art Workshop hi a hawng a. He workshop hian vawiin ni 17 atanga 20 November, 2015 thleng a awh ang.

MADS hi October, 2012 ah din tan a niin I & PR Department chu Nodal Department anih thu sawiin khuallian Pu Lalthangmawia Vandir chuan a din tirh atangin he society puala programme hrang hrang neih a lo nih chhoh dan leh heng zawng zawngah hian hlawhtlinna tha tak an lo neih tawhna ah lawmthu a sawi a. Art Work hi a ngaihsan awmin eizawnna tling a ni a, Mizoram ah hian kan la neih nun tawk loh avangin hetiang lama tuimi tlemte tih loh chu member pawh an la tam em em lova ni tiin khuallian chuan hun lokal zel turah tuna hmala tute thawhrimna hi an hlawhtlinpui ngei a rin thu leh ram leh hnam hmasawnna atan pawh thui tak a hril ngei a beisei thu a sawi a, MADS memberte leh Pi Lalhmingmawii (Amawii) te inpekna leh hma an lo lak tawh zawng zawngnaah lawmthu a sawi bawk a ni.

Pu Laltanpuia, President, MADS kaihhruai vawiina Art Workshop 2015 hawnna ah hian Pu Vanlalhriata, Secretary, MADS chuan report a pe a. Nodal Department I & PR te nen an thawhhona a that avanga an pawl chu la intungnung thei a ni tiin an tawiawmna zawng zawngah lawmthu a sawi a. Tunah hian member 64 awmin pawl hmalakna March, 2013 -November, 2015 chhung hian exhibition, wprkshop, competition, exposure tour, outdoor study tour etc. vawi 14 lai neih a lo nih tawh thu leh hma an lo lak tawh dan hrang hrangte report a pe a ni.

Pi Lallianpuii, Dy. Director, I & PR pawhin thu sawiin a bik taka thiamna nei tan lo chuan hetiang Arts lam hi tih ve theih a ni lova, mi nazawngin painting leh hmanraw hrang hrang hmanga thil siam structure te hi a tih ve mai theih lova, hetianga thiamna bik nei kalkhawmte hian mi zawng zawng neih theih loh theih bikna (talent) an neih hi hmang tangkaia chhawm nung zel turin a fuih a ni.

He Workshop hian tunkar zirtawpni thleng a awh anga, hetiang lama tuimi leh a duh apiangte entheih turin hawn a ni.