Vawiin khan Social Welfare Department chuan an Department Conference Hall, Laipuitlangah Hmeichhiate hmasawnna atana kawng hrang hrang an dinhmun chawikan nana hnathawk tha, Mizo hmeichhe pahnih, Rajya Mahila Samman leh Zila Mahila Samman dawngte hnenah he chawimawina hlanna leh a lawmpuina programme an buatsaih a. He hun hi Social Welfare Department enkawltu Minister Pu P. C. Lalthanliana chuan a hmanpuiin Pi Thansiami, Durtlang, Rajya Mahila Samman 2015 dawngtu leh Pi K. Pari, Saiha, Zila Mahila Samman 2015 dawngtute hnenah heng chawimawinate hi a hlan a ni.

Pu P.C. Lalthanliana chuan kan Award hlan tur te hi Sawrkar Laipuiin hmeichhia te chawikan zelna atana kumin atanga a siam thar, kumtina pek chhuah tur a ni a. He Award in a tum ber chu Hmeichhiate chawikanna leh hmasawnna kawng a hnathawk tha, hmeichhe fel leh midangte tana in pe te hnathawh hriatpui leh chawimawi a ni a, a ti a. Award dawngtute hi a lawmpuina hlanin hmeichhia te hamthatna leh chawikanna hi mipa tan pawh malsawmna a ni, a ti a. Hetiang a chawimawina thil ruahmanna a awm hian mi tam tak thil tha ti turin a fuih ngei ang tih ka ring a ni, a ti bawk.

Minister chuan Ram hmasawnna tak tak thleng tur chuan hmeichhia te hi in pawimawh a, in changkang hmasak phawt loh chuan chhungkua leh ram in hma a sawn thei tak tak lova. Nangmahni ah hian midang zawng zawng hi kan innghat ti ila a sual awm love. Chuvangin kawng hrang hrang zirnaah te, hriselna kawngah te, sumdawnna kawngah te, ram rorelna lamah te pawh tanla sauh sauh turin kan sawm a che u, a ti.

Pu P. C. Lalthanliana chuan phurpui tur dik tak leh chawimawi tur dik takte thlan thiam a pawimawhin ngaihsan tur dik tak ngaisanga, chawimawi tur dik tak chawimawi hi Mizo hnamzia leh nunphung a ni a, tiin hetiang kawngah hian tan kan lak thar hi kan mamawhin a pawimawh hle in ka hria a ni, a ti a. A chhe lai leh thalo lai tarlan leh phochhuah hian thatna chin nei thin mahse a tha lam sawi leh chawimawi tlak te chawimawi te hi kan chin fo hi kan hnam tan a tul a ni, a ti bawk.

He hun hmanpuitu dang Social Welfare Department-a Secretary Pu Arun Goyal, IAS chuan Sawrkar Laipui ruahmanna in state tinah hmeichhiate chunga hleilenna leh harsatna a thlenin kawng hrang hranga an mahni tanpui tur atan One Stop Centre leh mobile helpline te din a nih tur thu a sawi.

He programme hi Pi Vanlaldini, Director, Social Welfare Department chuan kaihruaiin Pi Chuauzikpuii, Assistant Director chuan Award dawngtute Pi Thansiami leh Pi K. Pari te chanchin leh an hnathawh te a tarlang.

Pi Thansiami hi Asst. Nursing Superintendent a pension niin a nurse nih lai Rambuai lai khan nasa takin nunau leh naupai leh miharsa te tan hna a lo thawk thin a. Kum 2009 khan Rampuma Nurse te tana chawimawina sang ber Florence Nightingale National Award a lo dawng tawh bawk a ni. Pi K. Pari hian Mara hmeichhiate tan kawng hrang hranga hna thawkin an dihmun chawikan nan hna a thawk bawk thin a ni.

Rajya Mahila Samman hian Citation bakah pawisa fai Rs. 40,000 a keng tel a. Zila Mahila Samman hian Citation bakah Rs. 20,000 a keng tel bawk. Heng Award a tan hian Social Welfare Department chuan nomination Sawrkar Laipuiah a thehlut a, Ministry of Women & Child Development-in Rampum, State leh District Level Award dawngte hi an rawn thlang a ni. Heng Award hi kumin hian Ministry-in a ruahman vawikhatna a ni a, kumtin pekchhuah tur a ni.