Vawiin khan MIFCO Board of Directors meeting vawi 82-na chu an Chairman Pu PC Zoram Sangliana, MLA hovin NLUP Conference Hall-ah neih a ni.

Meeting-ah hian MIFCO dinhmun tlangpui tarlan a ni a. MIFCO leiba (liabilities) cheng nuai 434.74 atangin cheng nuai 308.28 an rul tawh a. MIFCO siam chhuah squash leh zu hralhna belhkhawmin sawrkar sum bawmah cheng nuai 850 an khung a ni.

Sairanga MIFCO hmunah tui thianghlim (packaged drinking water) siam turin hma lak mek a ni a. Zemabawka ran talhna leh sawngbawlna tihchangtlunna hna kalpui tan mek a ni. State pawna MIFCO thil siam chhuahte State pawna hralh a nih theih nan marketing partner neiin hma thar lak mek a ni a. An thei tui sawr sa 54.12MT cheng nuai 65 man hu vel la awm pawh hralh zawh vek tum a ni a, State sawrkar department-te bakah tualchhung sumdawngte nen indawr mek a ni.

MIFCO chuan kumin chhungin kut hnathawktute thar chhuah sapthei 1736.79 qtls., cheng nuai 24.32 man a lei tawh a, a man pek tlak vek tawh a ni bawk. Hengte hi sawrkar flagship programme NLUP hnuaia Tuikum Cluster-a sapthei chingtute leh Suangpuilawn khaw thar chhuah a ni. Sapthei leina sumte hi MIFCO-in a thil siam a hralh chhuah lehna sum inlumlet atanga pek thin a ni.