Nimin khan MIFCO Chairman leh Kolasib bialtu MLA leh YMA General Conference 2015 a Organizing Committee Chairman ni bawk Pu P.C. Zoram Sangliana chu Bairabi ah kalin, YMA General Conference atana inbuatsaihna hrang hrang kalpui mek leh hmachhawp neihte chu Organizing Committee hruaitute nen a hmun an thlir ho a. Bairabi Playground-a YMA General Conference thlenna atana pandal sak mek ‘Zofate Run’ leh rorel inkhawm neihna tur Hmar Veng Hall cheibawl mekte an fangkual a. Hemi hnu hian PWD IB ah thukhawm leh in tui, eng, inthiarna leh thil dang pawimawh te Organazing Committee-a a thawhpui YMA hruaitu leh Sub-Committee hrang hrang hruaitute nen an sawiho a ni.
Pu P.C. Zoram Sangliana chuan Bairabi-a YMA Khawmpui vawi 70-na hlawhtlinna turin Sawrkar chuan a tih tur chin a ti zel dawn a, Chief Minister Pu Lal Thanhawla pawhin Conference hlawhtlinna turin he thil hi a Office atangin a vil reng a ni, a ti a. Department hrang hrang ten an theihna zawn theuha theihtawp an chhuah chu lawmawm tiin Bairabi khaw mipui leh YMA member zawng zawng chu Conference hlawhtling taka neih anih theih nan an tha leh zung senga theihtawp chhuaha tan la theuh tura ngenin a sawm a ni.
YMA General Conference vawi 70-na hmanna tur, Bairabi Playground-a Pandal ‘Zofate Run’ sak mek hi a dung feet. 200 leh a vang feet 120 a ni a, hemi bakah hian stage (feet 70 by feet 50) sak a ni dawn bawk a. Pandal hi palai 8000 vel thleng thei tura buatsaih a ni dawn a. Chakkeshwari Bandhar Tent House, Silchar ten October ni 1 atangin khan Pandal hi an sa tan a, Pandal sak leh a chei hna te chu October ni 17-ah zawh hman vek tum a ni. Pandal sa tur hian agreement an siam ang chuan hun tiam chhunga an zo lo a nih chuan a sa tute hi a sakna man pawisa pek an ni lo ang.
Playground ah hian Conference chhung atan office leh hmun pawimawh atana hman tur leh Mizo kutchhuak te phochhuahna tur stall 5 YMA member te hian hnatlang neiin an sa mek a ni.
YMA General Conference vawi 70-na hi October ni 20-22 chhung hian neih a ni dawn a, Chief Minister Pu Lal Thanhawla chu khuallian a ni dawn a, kumin hian Central YMA hruaitu thar thlanna neih a ni dawn bawk a ni.
