No.6284/2020-2021

Mamit 20th October, 2020: Pu R. Lalzirliana, Minister P&E, Art & Culture, LRS&WC/DC&MA chuan vawiin khan Assam leh Mizoram inrina Thinghlun khua tlawhin, Er. H. Lalzirliana, Mamit bialtu MLA leh Pu Zothantluanga, MLA Aizawl West - 1 te'n an tawiawm.

Pu R. Lalzirliana chuan Thinghlun khawtlang hruaitute hma-ah thusawiin tun hnaia Mizoram leh Assam ramri-a buaina kan tawh chungchangah Thinghlun khaw mite'n harsatna an tawh chu pawi a tih thu sawiin, hei hi Thinghlun khawtlang tawrhna mai ni lovin Mizoram pum tawrhna leh harsatna a nih thu a sawi a. Ramri-a duty-te chu ram leh hnam humhalh nana duty an nih angin theihtawpchhuah zel turin a sawm a. Kan pi leh pute atanga kan hmunhma lo luah thin chu humhalh a tul thu sawiin Mizo nun ze mawi chhawmnungtu ni zel turin a chah a. Discipline tha tak nena Sipai duty a hmuh chuan a tihlawm thu leh thlamuanthlak a tih thu sawiin mamawh an nei a nih chuan inthlahrung lova thuneitute hnena thlen zel turin a chah bawk.

Minister hian Assam ramri-a Sipai duty nunna chan an awm a nih chuan Mizoram Sawrkar chuan Exgratia 35 lakhs a pek dawn bakah an Pension thlengin an thla hlawh pangngai kha an nupui fanaute'n an lak dawn bakah an chhungte eizawnna tur Sawrkarin a theih ang anga a ngaihtuahsak dawn thu a sawia. Ramri-a Sipai duty-te awmna hmun thleng hian Kawlphetha changtlung taka an hmuh theihna turin ban phun a nih dawn thu a sawi bakah Duty- te tan hian Water Cooler, Syntex leh Refrigerator a pe a ni. Thinghlun khawtlang tan an khaw VCP hnenah Rs 10,000/- ( Singkhat), Langkaih Group YMA tan Rs 10,000/- ( Singkhat), Thinghlun MHIP tan Rs 5,000/- (sangnga) bakah IR Duty-te chawhmeh man atan Rs 5000/- (Sangnga) a hlan nghal bawk a ni.

Minister leh MLA rual Thinghlun tlawhtute hi Pu Lallianmawia, IPS, Commandant, 4th IR, a hmuna awmchilh mektu chuan lo dawngsawngin Dr. Lalrozama, IAS Mamit District Bawrhsap, Pu Shashank Jaiswal, SP, Mamit, Pu Andy Lalfakzuala, SDO (C), Kawrthah, Pu T.C Pachhunga, Ex MLA, Vice Chairman, SYA & Tourism Dev. Board, Pi Lalhmingliani Hmar, SE, Project Circle -I, P&E Department, Pu Thanglura Sailo, EE, P&E, Mamit, Pu C. Lalzarliana, EE, P&E, Kolasib bakah Officials dangte leh Khawtlang hruaitute'n an tawiawm a ni.

Vawiin vek hian Minister leh MLA-te hian Kanhmun Medili boruak thlithlaiin an tlawh nghal a. Ramri-a cheng Mizote thlamuanin thu an sawi a ni.

Attachment

  • Loading attachment...