No.2219/2021-2022
Aizawl, the 15th September 2021 : Nimin khan Saitual District-a UD&PA Department DUDO Office hawnna leh DUDO Office building thar lungphum leh UD&PA Department hnuaia SEDP fund hmanga sak, Rulchawm Auditorium te chu Power Minister leh Tawi bialtu ni bawk Pu R. Lalzirliana’n a hmanpui a. Minister hi Pu Lalrintluanga Sailo, MLA leh Deputy Govt. Chief Whip, Er. H. Lalzirliana, MLA leh Vice Chairman Road & Infrastructure Development Board leh Pu Rochhunga Ralte, Vice Chairman Land Revenue and Survey Board ten an tawiawm a ni.

Rulchawm Auditorium sak thar leh DUDO sak thar tur puala programme ah thu sawiin Pu R. Lalzirliana chuan District Office te hmun khata dah a that rualin Town Area huam chhung District Office te a awm thei a nih chuan khawtlang inlungrualna leh thawhhona tha zawk a thlen thei a, chumi beisei avangin DUDO Office hi Rulchawm ah dah a ni, a ti a. Deputy Chief Minister thahnemngaihnaa Rulchawm Auditorium sak zawh a ni thei leh hawn a ni ta chu lawmawm tiin Auditorium changtlung leh tha tak hi District thar tan thil chhuanawm tak, mipuite tana thil tangkai tak a nih tur thu a sawi a. District mipuite inngeih tlang ila, inlungrual ila, rualkhai takin thil tih tum ila District hlim kan ni thei anga chu chuan mitin tan boruak tha leh boruak hlimawm a siam thei dawn a ni, a ti bawk.

He hun hi Pu H. Lianzela, Director, UD&PA Department-in a kaihruai a. Rev. Lallianzara, Keifang Pastor Bial-in Pathian hnena inhlanna hun a hmang a. Technical Report Pu HVL. Zarzoenga, Joint Director (P) UD&PA Department hnen atangin ngaihtlak a ni a. Pu Lalrintluanga Sailo, Dy. Govt. Chief Whip, Er. H. Lalzirliana, MLA; Pi Margaret Lalrinawmi Fanai, Addl. DC, Saitual District, Pu Ramchhuanmawia, Chairman, Jt. VC, Saitual Town leh Pu Smith Lalruatfela, VCP, Rulchawm- te hnen atangin thusawi tawi ngaihthlak a ni bawk a. Pu R.L. Zidinga, District Urban Development Officer, Saitual-in lawmthu sawina neiin hun a khar a ni.

Rulchawm Auditorium hi mi 250 lenna tura duan niin State fund 2017 - 2018 atanga sak a ni a, Administrative Approval & Expenditure Sanction hi October ni 9, 2017 khan hmuh niin, tender-te tihfel a nih hnuah Auditorium sak hna hi July ni 9, 2018 ah thawh tan niin, August ni 31, 2021 khan zawh fel a ni.

Rulchawm khawtlangin High School hmun thenkhat DUDO Office leh Staff Quarters sakna atan hian UD&PA Department a pe a. District Urban Development Office building sak tur hi a dung 46 ft. leh a vang 28 ft. niin floor 2 tur a ni a, Ground Floor hi Office atana hman tur niin, First Floor hi floor area hi 120.98 Sqm niin, Conference Hall atana ruahman a ni.

DUDO, Saitual hian August ni 1, 2020 atang khan Office a luah tan a. Office hmun tur nasa taka zawn a nih hnuah Rulchawm VC in phal takin BNRGSK Hall chu a thlawnin a luahtir ta a. September ni 24, 2020 atangin tuna office hi luah luh tan niin, Saitual DUDO Office-ah hian Department hnuaia scheme hrang hrang - HFA, NULM leh SBM bakah works chi hrang hrang khawihin hma lak ve mek zel a ni.