Vawiin khan Rural Development Minister Pu R Lalzirliana chuan Thingsulthliahah State Institute of Rural Development & Panchayati Raj  (SIRD&PR) Extension Training Centre building a hawng.

Pu R Lalzirliana chuan SIRD chu thingtlang mite chawikanna atana thil pawimawh chi hrang hranga mipui leh thawktute training petu, tlakchhamna lai hre tura zirchianna (research) neia, sawrkar finchhuah tura din an ni, a ti a. An din chhan ang ngeiin SIRD hian sawrkar kum kalta chhung khan training tum 240 zet buatsaihin mihring 10,196 an zirtir hman a ni,  a ti. RD Minister chuan SIRD hnathawh fakin research programme pathum an zawh tawh leh 4 dang thehluh mai hmabaka awm chu mipui tan a tangkai ngei a beisei thu te, RD Department hnuaiah social impact assessment unit atana ruat an nih anga an hmalakna te, PMKSY ah pawh enzuitu tura ruat monitoring & evaluation thawk tur an nih anga Champhai, Siaha leh Kolasib huamchhungah hnathawh vilzui hna tha taka an thawh thu he hunah hian a sawi bawk.

SIRD&PR hi Mizoramah kum 2000 khan Aizawla din a ni a. Kolasib, Thingsulthliah leh Pukpui, Lungleiah Training Center dang awmin heng hi kumtinin Central in cheng nuai 20 a pe thin. SIRD&PR, Aizawl hian sawrkar laipui atangin kum kalta khan cheng nuai 129.23 a dawng a, State sawrkar atangin cheng nuai 71.2 an dawng bawk.

Thingsulthliah SIRD Extention Training Centre hawn tak sak hna hi Ministry of Rural Development sum hmangin kum 2017 March ni 14 khan tan niin March 25, 2018 ah zawhfel a ni. Faculty quarters pahnih, IV Grade quarters pahnih sak a nih bakah hostel sak zawh hna thawh a ni bawk.

SIRD Extention Training Centre Auditorium-a Building hawnna inkhawm buatsaih hi SIRD&PR Director Pi Maria CT Zuali'n a kaihruai a. SIRD ETC Principal Pu Lalthanmawia Ralte chuan technical report a pe a, SIRD&PR Sr. Core Faculty Pu Khuangthansanga Pakhuangte chuan lawmthu sawina hun a hmang a ni. Programme ah hian Thingsulthliah khawtlang hruaitu VC te leh tlawmngai pawl hrang hrang hruaitu te telin SIRD&PR Centre thar hawn a ni chu lawmawm an tih thu an sawi a ni.