Vawiin hian Rural Development Minister Pu R. Lalzirliana chuan Serchhip P&E Veng, Roman Catholic kohhran enkawl Marian High School in sawrkar hnena ram an pek, Kalvary tlanga MGNREGS Convergence sum senga PHE Department tui semchhuah tur dahkhawlna lian, tui Litre nuai ruk dawng chu a hawng.

A hawnna inkhawm tawi, Marian High School Hall a neih ah Minister chuan, Catholic kohhran ten mipuite mamawhna hrethiam a engmah phut let nei hauh lova an School ram hmun rem tak Tuizem dah nana an pe chu lawmawm a tih thu sawiin, tunlaiah mi tam tak ten zangnadawmna beiseia an ram nilo pui pawh dik hlel taka an ta neih luih duh laia hetianga a thlawna sawrkar hnena ram tha tak an hlan hi Catholic kohhran chungah kan lawm em em a ni, a ti. Pu R. Lalzirliana hian a lawmzia entir nanMarianHigh Schoolhnenah hian a duh anga an hman atan Rs. 20000 a hlan nghe nghe a ni. Rural Development Department in ram tana hna tangkai a thawh hrang hrangte sawi langin Minister chuan, State Budget atangin he Department hian sum dawng tam thei bik lo mah se, Central Sponsored Scheme hrang hrang haichhuah lamah theihtawp an chhuah reng avangin hmasawnna hna an thawh pawh a tam a, mi harsa zawkte khaichhuahna leh vantlang mamawh thil hrang hrang a siam hnem tawh hle a, Mizoram tuam mawi bertu te zingah an tang ani, a ti.

He tuizem lian hi MGNREGS Convergence hmanga sak a nih angin DRDA leh PHE Department ten technical report an pe a. DRDA Serchhip Junior Engineer Pu David Zodingliana chuan,  Tuizem chu a biala RCC hmanga sak, a lai hawlhtlanga Meter 11.24 a zau, Meter 6 a sang leh Tui Litre nuai 6 dawnga sak a nih thu leh lirnghing laka him thei tura duan a nih thu a sawi a. A tuizem chauh hi MGNREGS sum atanga sak niin Rs. 25.23 Lakh an seng a ni. PHE Sr. Executive Engineer Pu Lalhruaia pawhin report pe in, Tuikum atanga tui pump chhohna pipe awm hmasa atanga he Tuizema tui a luh theih nan Pipe lian 100 mm Meter 310 a sei an phum belh thu leh a sem chhuah lehna tur atan pipe lian 65 mm Meter 125 an phum thar thu a sawi a. He Tuizem hian hun rei tak a semdarhna lama harsatna lo tawk tawh veng pali a chhungkaw 300 velte a chawm tur thu a sawi. Pu Lalhruaia chuan, tui dahkhawlna lamah Serchhipin harsatna a tawh thin avangin Pump laia an semchhuah hial thin thu a sawi a, chu harsatna sutkian pui tura DRDA Project Director Pi Teresy Vanlalhruaii hnena an kal thu leh ani hmalaknaa hetianga Tuizem tha an han nei thei ta chu a lawm tak zet thu a sawi a ni.

A hawnna inkhawm hi Serchhip District Bawrhsap leh MGNREGS District Co-ordination Committee Chairman ni bawk Dr. Lalrozama, IAS chuan a kaihruai a, Project Director, DRDA Serchhip Pi Teresy Vanlalhruaii chuan kalkhawmte hmaah lawmthu sawina hun a hmang thung.

He inkhawmah hian Serchhip SP Pu Lalringdika leh District Officer zawng zawngte, chanchinbumite, Serchhip Town chhung Village Council member te, Marian High School zirlai naupangte leh midang thahnem tak an kal khawm a ni.