Nimin khan Pu R.L. Pianmawia, Dy. Govt. Chief Whip leh Tuivawl Bialtu MLA chuan Darlawn DFO Quarter Rs. 20,00,000/- (cheng nuai sawmhnih) senga sak zawh tak chu a hawng. DFO Quarter hi RCC a sak niin, a dung 48ft., avang 28ft. a zauva sak a ni. Hawnna hunah hian Darlawn a sawrkar Department hrang hrang te, NGO hrang hrang te an tel.

DFO Quarter hawnnaah khuallian chuan kang mei laka kan fimkhur a tul zia uar takin a sawi a, Pathianin chenna tlak tura boruak thianghlim siamtu thing leh mau min pekte hi kan humhalh that a tul takzet a ni, a ti.

Pu R.L. Pianmawia hian sawrkarin sum harsatna a tawk mek chung pawha hmathar lakna tam tak leh hmasawnna Department hrang hrang te thawh dan a tarlang bawk. Sawrkar hnathawk kalkhawmte chu an thawhna hmunah theuh awm tha tur leh taima tak mipui tan thawk zel turin a fuih bawk. Sawrkar hnathawkte chu anmahni dawrtu te hrang hrangte dawhthei taka lo dawngsawng thin turin a fuih bawk.

DFO Quarter hawnna neih hma hian Darlawn Forest Division hmalakna thenkhat -Kuiri 2011-2012 National Bamboo Mission hnuaia Plantation Pu Thula Mual a mi leh Leitan kawna Nursery siam thar te Bialtu MLA hian a hmun ngeiah tlawhin Department hmalakna chu chhuanawm a tih thu a sawi. Mizoram a Forest Division hrang hrangte pawhin entawn a, enfiah ngam nei vek thei se a duhthu a sawi bawk.