Vawiin chawhma khan Sateek Community Hall-ah Shyama Prasad Mukherjee Rurban Mission (SPMRM) hnuaia Eco-tourism leh Ministry of Tourism kalpui Paryatan Parv pualin hun hman a ni a. Rural Development Minister Pu R. Lalzirliana chu Khuallian niin Sateek khuaa Lianphunga Bung bulah Cycling Track lungphum a phum nghal a. Rural Development Minister hi MLA Lt. Col. Z.S.Zuala chuan a tawiawm a. He hun hi Mizoram Sawrkara Rural Development Department (RDD) leh Ministry of Tourism tangkawp buatsaih a ni.

Khuallian Pu R. Lalzirliana chuan SPMRM chu thingtlang khua ten khawpui-a chengte neih ang an neih theihna tura buatsaihna, intluktlanna atana hmalakna a ni, a ti a. Mizoramah chuan thingtlanga chengte hi za-a sawmli pakua vel an ni tiin SPMRM chu thingtlanga chengte tan zirna in tha, tui leh electric supply, kawng tha leh inhlawhna ngelnghet zawk an theih nana hmalakna a ni a, he Mission-in a  tum ber pakhat chu khawpui lama hmasawnna ruhrel thingtlang khaw hrang hranga dahsak ve a ni, a ti a.  Mithiam zawkte chuan hmasawnna thleng tur chuan mihring rilru buatsaih hmasak phawt a ngai a, mihring rilruin hma a sawn ang zelin pawn lam hmasawnna kalpui tur a ni tih thu sawiin mihring rilru buatsaih hmasa lova pawnlama hmalakna kan kal chakpui lutuk chuan mihring rilru a kalsual theih thu a sawi a. Kalkhawmte hnenah chuan SPMRM hlawhtling tur chuan khaw mipuiten in tangkaina leh mawhphurhna in hriatchian a ngai a ni, a ti a. Mizoram chu ziak leh chhiar thiam lamah kan sang hle a ni tih tarlangin hemi dinhmun luah awm renga kan awm a ngai a, kan thiamna hi tangkai zawka hmandan kan zawn zel a pawimawh hle a ni, a ti a. Kan ramah chuan primary sector (agriculture) hnuaiah hian kan ram mipui za-a sawmruk hian hna an la zawnga mahse hemi sector hian kan ram hausakna atana a pek let hi za-a sawmparuk vel chauh a ni tiin kan ram hausakna hmang tangkaia service sector hnuaia eco-tourism ang zawngte hian tan kan lak nasat a ngai a ni , a ti a. Kan ram dinhmun chawikang turin hmabak kan la ngah hle a, Mizoramah chuan skill development, sanitation, hygiene leh eco-tourism lamah tihtur a la tam a, hemi lama ke kan pen a tul a ni, a ti a.  Eco-tourism lama hmasawn tur chuan khawtlang hruaitute leh  khawchhung mipuiten mawhphurhna sang tak an nei a, theihtawp chhuah a ngai a ni, tiin kalkhawmte chu a fuih a ni.

Shyama Prasad Mukherjee Rurban Mission (SPMRM) hi kum 2015 atang khan tan a ni a, Mizoramah chuan Rural Development Department-in an kalpui a. India ram chhungah enchhinna atan cluster 300  thlan chhuah phawt niin chung cluster thlanchhuah bik zingah chuan Aibawk Cluster hi a tel a. Aibawk Cluster hi Aizawl district hnuaiah awmin khaw 11 a awm a. Hengte hi Melriat, Kelsih, Falkawn, Muallungthu, Tachhip, Sateek,  Maubuang, Thiak, Sumsuih, Aibawk leh Phulpuite an ni a. Thingtlang mite dinhmun chawikanna tura ruahmanna niin chung ruahmanna thenkhatte chu – wholesale market, dairy farming, link roads, orchid centre, poultry farming, piggery farming, cycling track an ni. SPMRM hnuaiah hian Sawrkar department 10 an thawkho a ni.

Paryatan Parv hi Ministry of Tourism hnuaia kalpui niin India ram hmun hrang hrangah October Ni 5-25, 2017 chhunga neih tura ruahman a ni a. Khualzinte hipna atana hmalakna pakhat niin hemi puala mipuite hnena inhrilhhriatna neih a ni a, painting leh essay ziah intihsiakna neih a nih bakah cycling track thar siam tura ruahmanna neih a ni bawk.

Cycling track hi Lianphunga Bung bula awm tura ruahman niin track hi km 2.5 a ni a, helai hmun hi cheithat tum niin inthiarna, store-house leh a dangte sak tura ruahmanna siam a ni.

Vawiin programme hi RDD Secretary, Pu Lalhmingthanga, IAS in a kaihruai a. RDD Addl. Secretary, Pi K. Lalrinzuali chuan kalkhawmte lawmna thu a sawi a. Aizawl DC Dr. A. Muthamma chuan thusawiin SPMRM hnuaiah thingtlanga hmalakna tur hrang hrang a awm thu sawiin kan pi leh pute atanga kan rochun thil tam tak phochhuahna kawng bakah eco-tourism-a kan hmasawnna turte a sawi a. Aibawk BDO Pu Lalmuanpuia atangin SPMRM Aibawk Cluster-a kalpui anih dan ngaihthlak a ni a. RDD Under Secretary Pu Paul. L. Khuma chuan Eco-tourism chungchang thusawina hun a nei a. RDD Director Pu Lalhriatpuia chuan lawmthu sawina in hun a khar a. Hemi puala Painting leh Essay Competition buatsaih a tithate hnenah lawmman semna neih a ni a. Mission Antyodaya Gram Samridhi Evam Swachhta Pakhwada hnuaia zirtirna kalpuina a kal that lawmman Samlukhai khua hnenah pek a ni bawk. Rural Development, Social Welfare, Power & Electricity, Health & Family Welfare, I& PR Department-a thawkte an tel a ni.