3810/2022-2023

Champhai, the 10th March, 2023: Power & Electricity, Art & Culture, Land Resources Soil &Water Conservation leh District Council &Minority Affairs Minister Pu R.Lalzirliana chuan vawiin khan Champhai leh a chhehvela pipu sulhnu leh Sawrkar hmalaknate tlawhin a enfiah.

North Khawbunga vantlang inkhawm neihah Art& Culture Minister Pu R.Lalzirliana chuan pipu sulhnu tam tak awmna khawchhak tlangdung fan chu lunglenthlak a tih thu tarlangin, pipute nun dan leh zonun zemawi tak an lo nunpui tawh dante a hriat chhuah tir thin thu a sawi a. Nu leh pate thu awih leh upate zahthiam chu malsawm dawnna a nih thu sawiin, mipuite chu zonun zemawi chawinung zel tur leh, midangte thil tih dan sawisel mai lova, an thil tih thatte hriatsaka finchhuahtu nih tum zawk turin a fuih a ni.

Minister tawiawmtu Health & Family Welfare Board Vice Chairman Dr. ZR Thiamsanga, Champhai North bialtu MLA chuan hrileng karah mipuite nitin khawsak kawnga mamawhte Sawrkarin a ngaihtuah zel thu a sawi a. Health Sub-Centre te Health & Wellness Centre-ah hlankai an nih thu leh, Health Sub-Centre awm lohnaah Health Clinic-te dahin Health Department hnuaia thawktute pawh a theih anga ngaihtuah zel a nih thu a sawi a. District Hospital Champhaiah cheng vaibelchhe 14.5 sengin Critical Care Block siam tum a nih thu leh sum pawh ruahman fel a nih thu a sawi a. Nursing School Hostel sak mek a nih thu pawh sawiin, a ranglama Nursing School kalpui a nih theih nan Sawrkarin hma a lak zel thu a sawi a. District Hospital Champhaiah ICU leh Dialysis-te pawh thawktu indaihlohna karah kalpui mek zel a ni tiin, Trauma Centre puitlin theih nana theihtawp chhuahho a pawimawh thu a sawi a. Heng bakah hian Health Care Scheme kalpui tura Sawrkar hmalaknate a tarlang bawk.

District Bawrhsap Pu James Lalrinchhana chuan Art & Culture Minister thurawn bawhzuiin pipu sulhnu North Khawbunga mite zirchiangtu tur Archaeologist-te sawmna ziaka thlen tum a nih thu a sawi bawk.

Minister Pu R.Lalzirliana hian vawiin chawhnu khan Hmunhmeltha leh Zote khuate tlawhin khawtlang hruaitute kawmna hun a hmang a. Non Lapsable Central Pool of Resources, NLCPR (DoNER) kaltlanga cheng nuai 1,988/- senga Champhai khawpui sira luang Keilungliah Lui khuah (Construction of Dam Reservoir and Development of Recreation Centra at Keilungliah, Champhai) hnathawh mek pawh a tlawh bawk.

P&E Minister hian tukin khan 132/33 kV Sub-Station Keifangtlang, Champhai tlawhin P&E Department hotute kawmin Champhai District-a power supply dinhmunte a sawipui a. Tuna 12.5 MVA Transformer hman mekin District mamawh a phuhruk tawh chiah loh avanga 12.5 MVA Transformer dang bun mek zawh fel tep tawhte pawh a tlawh a. 11kV Isolator Switchyard pakhat, a bunna hmunhma cheithat ngai pawh a enfiah a, siam that a nih theih nan bawhzui a nih tur thu a sawi bawk.

Nitin khawsakna leh nunphungahte power supply hnianghnar tak neih a tul thu leh a tel lova khawsak a harsat tawh thu a sawi a. Tuikhuah hmang chauh nilo, nizung chakna hmanga power siam chhuah tuma hmalak mek zel a ni tiin, hmalakna leh hmachhawp awmte a tarlang a. Thawktu indaihlohna karah P&E Department hnuaia thawktuten chhunzan zawma theihtawp an chhuah thin chu fakawm a tih thu a sawi a.  Mipui ten mamawh leh tul an tihte ngaihpawimawh sak hram hram tur leh, hmanrua leh bungraw neihte uluk taka enkawl thin tur leh, venhim kawnga tan la turin a chah a ni.