Vawiin khan P&E Minister Pu R.Lalzirliana chuan Govt. Aizawl West College Annual Week Closing Function chu Vanapa Hall-ah khuallian niin, a hmanpui bawk a ni.

Khuallian Pu R.Lalzirliana chuan thu sawiin Annual Week Closing Function-a Khuallian a ni chu lawm awm a tih thu a sawi a. Minister Pu R.Lalzirliana chuan pi leh pute, an lo zikchhuah tanga an lo chindan vawn nun chu thil pawimawh tak  a ni a, tang thar college naupangte pawhin hre thar leh zualin, College-a cultural club te pawhin rawn chhawm nung zel se, tiin a sawi a. Khuallian chuan Govt. Aizawl West College in hlawhtlinna tam tak a lo nei tawhnaah lawm awm a ti a, dinhmun sang leh zualah pawh a in vawrh thei a, hun reilo te chunga college-in hmasawnna a neih tawh te chu college zirtirtu hmasa leh vawiin ni a thawk te inpekna leh thawhrimna a ni, tiin a sawi a. Minister chuan Govt. Aizawl West College chu zirna In tha, mithiam rual chher chhuahna hmingthang tak leh sawrkar hmalakna hrang hrangte tih pui tlin a nih theih nana hmalatu leh hmlakpuitu leh ngaihtuahna senpuitu College ni zel se, tiin duhsakna a hlan bawk a ni. Zirlaite hi Pressure Group ni ringawt lo a, sawrkar finchhuah tu ni zel turin a fuih a, Annual Week chu zirna lama hmasawn tir tu leh rilru hrisel neihna kawnga pui tu leh hlimna tam tak pe tu tura hmanrua tha a nih a beisei thu a sawi a. Khuallian Pu R.Lalzirliana chuan zir sanna chu khawthlir ti zauh tu hmanrua ni se, midang ngaihdan te pawm thiam leh thlir thiam turin zirlaite chu a fuih bawk a ni.

He programme hi Govt. Aizawl West College Principal Dr. P.Lalremliana’n a kaihhruai a. Evangelical Union Choir chuan Fakna Hla sain he hun hi an hawng a; zirlai atangin Solo leh Violin Play te ngaihthlak a ni. Govt. Aizawl West College Annual Week ah hian a pumpuiah White House pakhatna an ni a, Red House pahnihna niin, Yellow House pathumna an ni. Intihsiakna hrang hrang Indoor leh Outdoor games te neih a ni.

Govt. Aizawl West College hi B+ NAAC Accredited a ni a, zirlai 806 an awm mek a, zirtirtu 37 leh non-teaching staff 13 an awm mek a ni. Under Graduate zirna bakah hian Post Graduate zirna hawn thuai tum a ni.