1297/2022-2023
Mamit 20th July, 2022 : Pu Robert Romawia Royte, Minister, Sports & Youth Services, Tourism, Information & Communication Technology chuan vawiin khan Mamit Chhimveng Hall-ah Govt. Mamit College Freshers' Social cum Graduation Day khuallian niin a hmanpui.

Khuallian chuan thu sawiin hmasawnna chu zirna in atanga bultan a ni thin a, changkanna nei tur chuan lehkha thiamin hma a hruai a ngai thin a ni tiin khawthlang ram chuan theihna potential sang tak an nei a, human resource lamah theihtawpchhuaha tan kan lak chuan thui taka hma kan sawn theih dawn thu a sawi. Tourism lama hma kan sawn theih nan YUVA Tourism club din tura zirlaite chu sawmin kan hnam ziarang, kan culture tivul zel turin a chah.

Kum 1983 atanga harsa taka dinchhoh College, tun thlenga tha taka enkawl a la ni zel chu lawmawm a tih thu sawiin College zirtirtute chu theihtawpchhuaha an zirlaite zirtir turin a chah a. Zirlaite pawh NAAC B+ Accreditation nei College-a lut pha an nih inhre tur leh College freshers te chu a bul tan that chu a chanve zo tih kan hriat a, tha taka bul tan a pawimawh thu a sawi a. Graduate tharte pawh hmabak tam tak la nei an nih avangin taima taka tumruhna leh teirei peihna nen thahnemngai taka an zirlaite zir turin a chah a. Theih loha kan ngaih hi tumruhna nena kan beih chuan a theih a ni tih hria a, kan tum tisang a, beiseina eng nei chunga hmabak hlen tum zel turin zirlaite chu a chah bawk a ni.

Pu M.S Dawngliana Hnamte, Principal, Govt. Mamit College chuan Govt. Mamit College chu Kum 1983-ah a hunlaia khawtlang hruaitute'n Kaichhunga College (KC College) ti-a an din tan thu a sawi a. Khawthlang zirlaite tan hmasawnna mellung pawimawh tak a ni dawn tih hriain harsa tak chung pawha an hawn luih ve tang tang hnuah Kum 1993-ah Deficit-ah hlankai a ni a, Kum 2007-ah Govt. College an nih thu a sawi. Kumina an Pass Percentage hi 93.3% niin Mizoram pumah College titha 5-na an nih mek thu leh result chhuak hnuhnung berah khan Mizoram puma English Subject-a 8-na M.K Bertilla chu an College mi anih thu leh chhuanawm an tih thu a sawi bawk. Tunah hian 1st Semester zirlai 51, 2nd Semester zirlai 48 leh 3rd Semester zirlai 61, an vaiin zirlai 160 an awm mek thu sawiin Graduate thar 42 an nei bawk a ni.

He hun hi session 2 a then hran niin chawhma lam hun hi Dr. Joseph C. Lalremruata, Asst. Professor, Dept. of Political Science chuan a kaihruai a. Pu H. Ramdinpuia, Associate Professor chuan lawmthu sawina a nei a ni.

Minister hian Govt. Mamit College hmunhmate a hmun ngeiah kalin a tlawh nghal bawk.

Minister hi Deputy Director, Tourism Department, SPO, Mizoram State Sports Council, JE bakah Officials dangte'n an tawiawm a ni.