Vawiin khan Minister of State for Sports & Youth Services leh President Mizoram State Sports Council ni bawk, Pu Robert Romawia Royte hovin a Officer Chamber, MINECO ah International inelna a medal la naupang pathum leh Republic Day Camp a tel Mizo NCC thalai 6 te lawmpuina programme hman a ni.

Borca, Sweden a Golden Girls International Boxing Tournament, January ni 30 leh February ni 3, 2020 inkara neihah Rudy Lalhmingmuani in 66 Kgs Category ah Silver Medal a la a. Abu Dhabi, UAE a IMFA Asian Muaythai Championship, December ni 17 leh ni 22, 2019 inkara neihah Joseph Vanlalhruaia in 48 Kgs Category ah Silver Medal la in, Eliza Zoramchhana in 34 Kgs Category ah Bronze Medal a la ni. Republic Day Camp a tel NCC Cadet te hi – Vanlalchhanhimi; Ngurnunsanga Sailo; Ruthi Rochanpuii; Joshua Remlalliana; Samuel PC Lalhriatpuia leh K. Lalmuanpuii te an ni.

Pu Robert Romawia Royte chuan kum khat chhungin Sports & Youth Services Department hnuaia hmasawnna leh hlawhtlinna tam tak a awm thu sawiin tunah Boxing leh Muaythai a hlawhtlinna leh Republic Day Camp a NCC cadet 6 lai tel thei kan nei hi a lawmawm a ti a. Midangte tana chona siamtu leh role model ni turin heng thalai hlawhtling te hi a chah bawk a ni. Sports a hlawtlinna chang te tan chapona neih a awl thu sawiin heng thalai hlawhtling te hi chapona lak a fihhlim turin a chah tel bawk a ni.

Department hmasawnna chungchang sawiin Minister chuan Sports Policy mumal tak kan nei tawh a, hlawhtling takin Mizoram State Games kan buatsaih a, heng hmasawnna hi Central Sawrkar pawhin min hriatpui a, hemi avang hian sports thilah Central Sawrkar pawh a in phal zau ka ring a ni, a ti. Sawrkar, sports association te leh infiammite kan tan tlana kan thawh ho chuan hlawhtlinna a awm zel a, tunah pawh chutiang hlawhtlinna tam tak sawi tur kan nei tiin kan thawhhona te hi a lawmawmin a chhuanawm hle in ka hria, a ti bawk.

Sports and Youth Services Department mawhphurhna chu sports hmasawnna mai bakah thalai te hmasawnna kawng tur ngaituah leh an tana thawh a nih thu sawi telin Sports Minister chuan Wing leh Branch hrang hrang kan awma, thalai nun kaihhruai nan NCC, NSS, NYK leh Scouts & Guides te hi an pawimawh a, chak leh zawka kan thawh ho a ngai a ni, a ti a. Thalai nun kawng inkaihhruaina kawngte, moral upliftment kawnga te NCC, NSS leh adangte chu hmanraw tha tangkai tak an nih thu a sawi a. Sawrkar in Mizoram chhim lam tan Lunglei ah NCC Battalion din chu a ngaihpawimawh thu sawiin hemi atan hian a building te sak mek leh chei that anih thu te leh a thawktu tur lakna pawh buaipui mek a nih thu a tarlang a ni.

Infiammi hlawhtlingte lawmpuina leh NCC cadet RDC a tel te lawmpuina programme hi Pu C. Laltlanthanga, Secretary, Mizoram State Sports Council chuan a kaihruai a. Minister hian infiamite leh NCC Cadet te hi lawmpuina thilpek a hlan a, Rudy Lalhmingmuani hian Kit Allowance a dawn loh avangin cheng 20,000 a hlan tel bawk ani.

He programme ah hian Sports, ICT leh Tourism Development Board Vice Chairman Pu T.C. Pachhunga, Sports & Youth Services Secretary Pu H. Lalengmawia leh a thawhpui dangte, Mizoram Boxing Association, Muaythai Association leh United Sports Association hruaitute leh Mizoram NCC Battalion 3 Commanding Officer te pawh an tel a ni.

Republic Day Camp a tel tur hian NCC Cadet te hian inelna hrang hrang an paltlang a ngai a. cadet nuai chuang atangin mi 120 vel Directorate pakhat atangin thlan chhuah an ni thin a. RDC hi NCC cadet tan chuan an thlen theihna sang ber a ni a. Mizo NCC cadet te hi tun tumah Prime Minister’s Rally ah te, National Intergration Awareness programme ah te leh inelna dangah te an zuk tel a ni.