Vawiin Ni 6.2.2020 Ningani hian School Education Minister Pu Lalchhandama Ralte chuan a bial chhung khaw hrang hrang Sunhluchhip, N.Serzawl leh Darlawn te a tlawh.

Minister hian heng a khaw tlawhahte hian mipuite hnenah thu sawiin ”Education-ah harh tharna a thleng tur a ni” tih chu tlangdung tina a au hla a ni tih sawiin harh tharna a thlen theih nan hian sorkarin hna thawk mek a ni, a ti a. Khawtlangin tan kan lakna tur pawimawh chu zirna hi a ni tih sawiin Minister chuan tun hmain thingtlang atangin mi ropui leh chhuanawm tak tak an chhuak thin, mi thiam, mi ropui an chhuah leh theih nan zirna hi ngaih pawimawh a tul hle a ni a ti. Hmar tlangdungah zirtirtu pakhat lek awmna te, pahnih chauh awmna te a lo tam hle tih sawiin tun hnaiah hmar tlangdung khaw hrang hrangah zirna thuam chak nan hian zirtirtu 87 dah thar an ni a. Teacher quarters pawh engemawzat sak thar a ni a, he tlangdunga Science zirna awm lo chu kum thar session atang hian hawn a ni dawn a, Samagra Shiksha atangin Science zirna Higher Secondary School Darlawnah hawn a ni dawn a ni a ti a. Hengte hi Education-a harh tharna thlenna tur kawng pawimawhte an ni a ti.

Minister hian mipuite tan inkalpawhna kawngpui tha siam te, tui in tur tha pek te sorkarin a ngai pawimawh tih sawiin nakin lawkah chuan he sorkarah hian thingtlang kilkhawr zawkte pawhin hengte hi an neih theih beisei a ni a ti bawk. Khaw thenkhat tana chhenfakawm tak Bamboo link road te pawh SEDP hnuaia project a lo chhuah hunah chuan sial tum a ni a ti a. Hmar tlangdung tan Zoram kawtchhuah thar - Bhaga leh Manipur kal pawhna tur kawngpui sial tura buaipui mek a ni a ti. Hmasawnna nghet leh tlote hi hun rei lote chhunga thawh mai theih a ni lova, hun rei tak ngai chi te an ni a, mipuiten dawhthei taka nghah a ngai a ni a ti bawk.

Minister-in a bial khaw hrang hrang a fannaah hian Sinlung Hills Council CEM Pu Lalthlamuana Hmar leh EM te, School Education Department-a Samagra Shiksha officer-te, Pu Lallawmawma SDO civil leh MNF party Gen Hqrs hruaitu thenkhatten an tawiawm a ni.