No.6649/2020-2021

Aizawl, 24th November, 2020 : Vawiin khan Aizawl East-II bialtu MLA leh Sports Minister Pu Robert Romawia Royte chuan Govt. KVM High School ah a bial, Aizawl East-II chhunga Veng pasarih - Dawrpui, Saron Veng, Chhinga Veng, Tuithiang Veng, Armed Veng, Armed Veng South leh Chite Venga chhungkaw harsa 220 te hnenah Puanthui Khawl a thlawnin a sem.

Khawtlang hruaitute leh bial mipui te hma ah thu sawiin Pu Robert Romawia chuan Bial chhung tana hmasawnna hna kawng hrang hranga thawh thulh chuang lova chhungkaw harsa engemaw zat hnena Puanthui Khawl pek chhuah a ni leh ta chu lawmawm a tih thu sawiin an khawl dawnte chu kawl satliah mai lo leh ti riral lo va, tangkai taka hmang turin a chah a.

Covid hripui vanga harsatna karah pawh bial hmasawnna hnathawh kalpui zel a ni tih sawiin Dawrpuia Indoor Basketball Court sak mek te, New Market sak thar mek leh sak belh tur te, Civil Hospital-a Mizoram mamawh em em Trauma Centre sak tura sum hmuh tawh dante, Armed Venga Field Chhawng siam mek te, Chite Veng Sport Complex tih hmasawn te, NE Tourism Mega Project-a Chite Lui tih tel ve tur te, Chhinga Veng, Saron Veng mawng leh Tuithiang Vengte kawngpui thara thlunzawm leh Armed Veng South chhunga inkalpawhna siamthat leh siamthar hna te thawh mek a ni tih a tarlang a ni.

Pu Robert Romawia Royte chuan Covid-19 hripui avangin nunphung a buai a, sum a vang a, hnathawh tur a tlem a, inhlawhfaa eizawng tan hnathawh tur a tlem a, ei leh in bakah kan ni tin khawsak mamawh a pangngai reng si a. Chuvangin, hripui len hmaa kan thawh peih loh te, thawh thiam loh te, thawh duh lohte pawh kan thawh a lo ngai ta a. Hnathawh tur awm ang ang thawh hreh nei loa kan thawh a ngai ta a ni a ti a, Pu Roberta chuan kan bial mipuite hian Mizo Upate thurochhiah “Sem sem dam dam” tih thupuiah kan nei zel ang a, Aizawl East-II bialtupain chaw ka nghei loh chuan ka bial mipuite pawhin an nghei bik lovang, ei leh bara harsatna nei hria chuan a hnenah hrilh zel turin a chah nghal a ni.

Chhungkaw tinte hripui laka an him theih nan sawrkarin inkaihhruaina dan a siam te zawm a,  hmai tuam leh kut silfai ngun te ngai pawimawh tur leh, tul lova pawn chhuak lo tur te, mi dangte nena in hnaih lova awm tur leh mithiamte thurawn leh zirtirna ngaih pawimawh leh tha taka zawm a ?ul thu sawiin hemi kawngah hian nasa taka hma lak a pawimawh tih pawh a sawi a ni.

Pu Robert Romawia hian a MLA Fund hmangin bial chhung hmasawnna hna hrang hrang a thawk tawh thin a. Kumin March thla khan a bial mipui chhungkaw 200 te hnenah Covid-19 do nan leh mahni intodelhna tur atan Puanthui Khawl 200 a lo sem tawh a. Tun tuma 220 a sem leh nen hian  kumin 2020 chhung hian MLA Fund atangin khawl 420 a sem tawh a ni.