1204/2023-2024

Mamit 20th July, 2023 : Pu Robert Romawia Royte, Hon'ble Minister of State, Sports & Youth Services, Tourism, Information & Communication Technology leh District Council & Minority Affairs Department changtu chuan vawiin khan Sihthiang khua-a Sports Centre chu khuallian niin a hawng.

Khuallian Sports Minister chuan Sihthiang khua Sports Centre, a lungphumtu ngeiin a hawng leh thei chu lawmawm a tih thu a sawi a. Tangkai taka Sihthiang mipuite'n an hman a duhsak thu sawiin Sports mai ni lo, Cultural Programme leh mipui intawhkhawm nan te hmang tangkai turin a chah a. Tun Sorkar chu hnathawk Sorkar a ni tiin Project lung kan phum zel anga kan hawng zel bawk dawn a ni a ti. Sports Centre thar lawmna ruai MPF phalna thlapa theh theih a ni chu lawmawm a tih thu a sawi bawk.

Sports Centre hawnna-ah Dr. C. Lalsangzuala, Chairman, Mizoram State Commission for Protection of Child Rights pawhin thu a sawi a, naupangte hman tangkai tur leh an harsatna an thlen theihna tur phone number awmna lehkhabu a hlan nghal a ni.

Pu James Lalramnghaka, AE, MSSC chuan Technical Report pein Sports Centre sakna atan hian 2020-2021 khan Pradhan Mantri Jan Vikas Kaaryakram (PMJVK) Scheme atangin Rs. 102.59 lakh approval hmuh a ni a. Project cost atanga 90% Rs. 92.33 lakh hi Central tum niin 10% Rs. 10.26 lakh hi State Sawrkar tum a ni. 18th July, 2022 atanga hnathawh tan niin 8th July, 2023 ah zawhfel a ni a. M/s Junior Consultancy Services te'n he hna hi an thawk a ni. Sports Centre-ah hian Play Area, Basketball leh Futsal khelh theihna Court, RCC floaring a siam a dung 32.00 m leh a vang 19.00 m awmin Fibre glass basketball board leh ring bakah Futsal Goal post leh net dah tel nghal a ni a. Pavilion 9.00 m × 4.00 m a zau chhawng hnih a sak awmin Basement Floor-ah hian Dressing Room pahnih dah a ni a. Ground floor hi Pavilion atana ruahman niin mi 30 vel leng thei tura ruahman a ni. Gallery, a dung 12.00 m leh a vang 3.7 m a zau awmin mi 50 vel thu leng thei tura siam a awm bawk a. Fencing, Play Area kual chhuakin ball liam tur leh danna atan leh a venhimna atan net fencing tha taka siam a ni a. Hei bakah hian Light System, zan lamah pawh Basketball leh Futsal khelh theihna turin tha tak dah nghal a ni bawk a ni.

Minister hian Sihthiang thalaite hman turin Jersey leh Ball te a hlan nghal bawk.

Sports Centre hawnna hun hi Pu Elvis Chorkhy, VCP Sihthiang chuan a kaihruai a. Pu Lalhruaia, VC Vice President chuan lawmthu a sawi a. Tlai lamah khawtlangin Sports Centre lawmna ruai theh a ni bawk.

Minister hi Chairman, Mizoram State Commission for Protection of Child Right, Chairman, ZOFISHFED, Zawlnuam, Jt. Director, Sports & Youth Services Department, JE, MTDA, Tourism Department bakah Officials dangte'n an tawiawm a ni.