No.3076/2021-2022
Aizawl, the 22nd November 2021 : Vawiin khan Sports & Youth Services Minister Pu Robert Romawia chuan India ramin zalenna a hmuh, kum 75-na tlin, lawmna kal mek Azaadi Ka Amrit Mahotsav lawmna peng chikhat atana Border Roads Organization (BRO) in India ram pum fangchhuak tur Motorcyle Expedition an buatsaih, Project Pushpak in Mizoram chinah an huaihawt chu Pusphak Primary School, Falkand atangin a vailiam.

Pu Robert Romawia Royte chuan BRO in India hmun kilkhawr leh border state ah te kawng te sialin ram tan an thawhhlawk hle thu sawiin Mizoram ah ngei pawh kawng leh lamlian sialtu pawl hmasa a nih thu te, tun thleng pawhin BRO chu Mizoram hmasawnna, a bik takin inkawlpawhna chungchangah thawktu pawimawh tak an ni,a ti a. BRO in Motorcyle Expedtion an huaihawt chu a lawmpui thusawiin hetiang adventure sports te chu Mizo thalai te tuihalna a ni a, a bik takin motor sports tihlar nan Lengpui ah motor sports complex Rural Electrification Corporation puihna in sak tum a ni, a ti. Mizoramin sports lama hmasawnna a neih dan te, a than chho dan te sawiin Sawrkar Laipuiin in Fit India Movement an tlangzarh hma, thla 5 lai hma in Fit Mizoram Movement chu Mizoram Sawrkarin a lo kalpui dan te pawh a sawi lang a. Expedition a tel chu an kal zelna turah duhsakna a hlan a ni.

Flag Off programme kaihruaitu Project Pushpak Chief Engineer Shri PN Yadav chuan Motorcycle Expedition neih chhan te sawiin Rally in a paltlang khua ah te Medical Camps buatsaih te, Swachh Bharat leh Road Safety Campaign chungchang puanzar te bakah fa hrah leh tar chawna in te tlawh an tum thu a sawi a ni.

Minister hian Motorcycle Expedition a tel Team Member te hnenah ngaihhruina a hlan a. He hunah hian BRO a tang tawh ex-servicemen leh BRO a thawk thin boral tawh nupuite te hnenah BRO in thilpek an ruahman te chu a hlan bawk a ni.

He Motorcyle Expedition hi New Delhi atangin October ni 14 2021 khan Defence Minister Shri Rajnath Singh’n a vailiam a. Ni 75 chhungin Indian dung leh vang kilometres 20000 chuang chu BRO hnathawk ‘BRO Karamyogis’ ten fanchhuak an tum a. Expedition kaltangin BRO chuan kum 60 chhunga ram tana an hnathawh thehlar te, remna leh muanna atan leh Sawrkar Laipui programme, ram chhunga thilsiam hrang hrang intodelh leh ngaihsan Atma Nirbhar Bharat te mipuite hnena puanzar an tum a ni.

BRO huaihawt Motorcycle Expedition hi chawng 7 a then niin, kilometres 7000 chuang an tlan tawh a. Hmun hla leh pan harsa - Pang, Leh, Kargil, Srinagar, Prayagraj, Varanasi, Nathula Pass, Guwahati, Tezpur, Itanagar, Pasighat, Doomdooma, Jorhat, Dimapur, Imphal te paltlangin nimin khan Expedition Team hian Aizawl an lo lut a. Vawiin khan Mizorama BRO hmunpui Project Pushpak buaipuina in Expedition Leg 4, Aizawl - Kolkata chu vailiam an ni.