Vawiin hian Chhiahtlang Community Hall ah Member of Parliament, Rajya Sabha, Pu Ronald Sapa Tlau chuan SAGY Village atana a thlan hmasak ber Chhiahtlanga Zoram Energy Development Agency (ZEDA) in Ministry of New & Renewable Energy bul tuma Solar Power Plant an bun thar chu a hawng.

A hawnna inkhawmah thusawiin Pu Ronald Sapa Tlau chuan, he hmalakna hi a tir te atangin a puitlin ngei a duh thu leh a nghahhleh thin thu a sawi a. Beisei ang ngeia a hlawhtling thei ta chu Chhiahtlang mipuite a lawmpui tak zet tih a sawi ani. He thil hlu tak hi lo duat a, a petu leh thawhsaktute tan pawha lawmna tham a lo hmang tangkai turin a chah ani. Changkanna hi a intanna chu mihring rilru sukthlek hi ani a, chutihlaiin khawvel ram tinin hmasawnna daltu lian bera an puh tlan chu eirukna a ni. Heng thil chi hnihte hi awmze neia kan kalpui a, changkang tura rilru dik kan puta, eirukna do ngam khawpa kan huaisen phawt chuan matheilovin hma kan sawn zel dawn ani, a ti a. Khaw changkang tak ni turin khaw lian tak nih hi a ngai hmasa chuang lo ani tiin Kristian ram nuam tak siam tura theihtawp chhuahpuiah kalkhawmte a chah ani.

Bialtu MLA, Er. Lalrinawma pawhin thusawiin, tunlai khawvel thiamna sang tak Solar Power Plant hmang phaa Chhiahtlang mipuite an awm chu vanneihthlak a tih thu a sawi a. Pu Ronald Sapa Tlau in Chhiahtlang SAGY village tana a hnathawh te chu fak tlak nia a hriat thu a sawi. Chhiahtlang mipuite chu neitu rilru pua duat taka heng thil tha an kuta lo lutte lo enkawla lo vawnghim tlat turin a chah bawk.

He hun kaihruaitu, Pu H. Lalengmawia, IAS, Chairman ZEDA Managing Committee leh P&E Secretary ni bawk chuan Mizorama power dinhmun tlangpui sawiin Mizoram Solar Power Policy tlangpui sawifiahna a nei a. Tunah hian Vankal ah 20 mw, Lungpher ah 30 mw, Lengpuiah 25 mw leh Tlungvelah 2mw siam tum mek anih thu a sawi a. Hun reiloteah sawrkar Building chung (roof) remchang apiangah Solar Power Generate tum a nih thu sawiin, kan ramin a mamawh zat power a neih ngei theih nan Power & Electricity leh ZEDA lam atang tea theihtawp chhuah a nih dan a sawifiah ani. Chhiahtlang khuain 95 kWp thei Solar Power Plant an nei thar chu an vannei hle tih sawiin, an khua SAGY (Model) Village a thlangtu Pu Ronald Sapa Tlau hmalakna a nih thu te a sawi a. Lo dima, lo enkawl uluk hle turin khawtlang mipuite a chah ani.

He hunah hian Er. David Ramnunsanga, Director, ZEDA chuan Technical Report a pe a. He solar power plant in a tum ber chu power supply chatlak lova thlan bik vantlang hmun te thlunzawmna tur a nih thu leh Street Light 200 Chhiahtlang khaw chhunga dah a nih thu a sawi a. Power a pek chhuak theih zat hi 95 kWp niin chu chu 95×1000 watt tihna ani. Pu Ronald Sapa Tlau in Model Village atana a thlanna rah kal zel atanga Ministry of New & Renewable Energy, Government of India in a rawn sanction ani. ZEDA lamin bawhzuiin Contractor hi M/s Andromeda Energy Technologies Pvt Ltd, Secundarabad, Telegana an ni a. Hna hi 27th April 2018 khan zawh fel niin Rs. 138.04 lakh sen a ni. Heng sum atan hian Central lamin engemawzat a tum laiin Beneficiary (a hmangtu) lamin Rs. 19.29 lakh an tum ve a ngai a. Heng Beneficiary tum ve tur sumte hi Mizoram sawrkarin a ngaihtuah sak dawn ani. He Power Plant hi a thawktu Company ten kum 5 chhung an enkawl zui ang a, chumi hnuah Chhiahtlang khawtlangin an enkawl zui ve tawh dawn ani.

Vawiina Chhiahtlang Solar Power Plant hawnnaah hian Pu CR Dothanga, VCP, Chhiahtlang pawhin lawmthu sawina hun a hmang a. Khawtlang mipui engemawzat an tel ani.