Vawiin khan RUSA sum cheng nuai 70 senga sak Lunglei Government College (LGC) Multipurpose Hall chu Higher & Technical Education Minister Pu R. Romawia’n a hawng.

Hawnna programme Pu LH Rothanga, Vice Principal, LGC kaihhruaiah Pu R.Romawia chuan a BA zirchuahna college ngeiah RUSA sum kaltlanga Multipurpose Hall changtlung tak a ding ta chu ropui a tih thu sawiin zirlaite leh zirtirtu ten tangkai taka an hman theih nan duhsakna a hlan a. Lunglei Goverment College chuan hmasawnna ruhrel (college infrastructure) leh zirna kawngah te chak takin hma an sawn chu lawmawm a tih thu sawiin LGC zirlai leh zirtirtute inpekna leh thawhrimna chu fakawm a tih thu a tarlang bawk.  Zirlai kalkhawmte hnenah fuihna thu sawiin Higher & Technical Education Minister chuan an zirlai ngai pawimawh hmasa berin tum mumal nei a, chhungkua, khawtlang leh ram tana chhawr tlak nih tum turin a chah a. Sawrkar hna awm ten a daih seng lo tih hriain eng kawng nge an zawh dawn a, eng kawngin nge ei an zawn ang tih ngaihtuah chunga hmathlir thui tak nen lehkha zir turin a chah a. Zirlaite chu an tui zawng leh thiam zawng lama anmahni kutkawiha dinchhuah leh intodelh tum tura chahin Mizoram sawrkar Flagship program NEDP hnuaia Entrepreneurship Development Scheme (EDS) te ngaihven ve turin a chah bawk.

He hunah hian Pi Lalhmangaihi Hrahsel, Principal, Lunglei Government College-in kalkhawmte lawmna thu a sawi a, Pu RK Vanlalsiammawia, Coordinator, RUSA LGC in Technical Report a pe a. Pu C Zairemthanga, HOD, Economics Department in lawmthu sawina hun a hmang bawk.