Kawng hrang hranga mau tangkaina inhrilhhriatna atan leh humhalh kawnga mipuite thanharh zelna atana buatsaih Mizoram Bamboo Day hmasaber chu naktuk khian hman a ni dawn a.  He ni lawmna chi khat atan vawiin khan Industries Minister Pu S Hiato chuan Assembly Secretariat Annexe-ah  ni hnih awh tur (2nd – 3rd March) Bamboo Exhibition-cum- Sales chu a duh apiang tlawh theih turin a hawng.

Pu S Hiato chuan Industries Department in hetianga mau leh a tangkaina pholanna hun rem tak an siam chu lawmawm tiin Pathian thil pek hlu tak mai – Mau hlutzia hi hriat nawn fo a, humhalh a, kangmei lakah mau hmun te venhim a tul thu a sawi a ni.  Pu S Hiato chuan Mau leh mau hmanga thil siam chuan ram sumpai dinhmun nasa takin a chawikan theih bakah thalai te tan eizawnna leh hna lamah kawng zau  tak  mau in a hawn thei  thu a sawi bawk a ni.

He Exhibition ah hian tualchhunga mau hmanga thilsiam hrang hrang pholanna stall 20 a awm bakah state pawn atangin Sikkim Bamboo Mission leh Nagaland Bamboo Development Agency ten stall an hawng bawk a. Environment & Forests Department, National Bamboo Mission Society lamin mau chi hrang hrang an lakhawm te chu an stall ah an pholang a. Industries Department hnuaia Handicraft Centre in Mizo pa hnang deh lai a taka entirna (live demonstration) an nei bawk a ni. Exhibition hi ni 2 chhung chauh atan buatsaih anih avangin Mizoram Bamboo Day Organizing Committee chuan mipui a tam thei ang ber tlawh turin an sawm a ni.

Naktuk March ni 3 khian Mizoram Bamboo Day hawna programme leh hemi puala Seminar leh Interactive Session buatsaih chu Chief Minister Pu Lal Thanhawla’n Aijal Club-ah a hmanpui ang. Hetah hian mau leh a kaihhnawih lama tui mite tel turin Mizoram Bamboo Day Organizing Committee chuan an sawm bawk a ni.