Pu S. Laldingliana, Parliamentary Secretary chuan vawiin zing khan a chenna in ah Lunglei tualchung chanchinbu mite a kawm. Chanchinbu mite hnena thu sawiin Referral Hospital hun rei tak chhunzawm tawh loh chu sorkar-in chhunzawm thuai a tum a, a changthu Minister hovin a hmunah en a ni, a ti. Lunglei Civil Hospital Casualty duty mumal awm thin lo pawh 24 hrs. duty an awm theih nan Doctor 4 dah belh thuai tum a ni, a ti. Lunglei Hospital-ah hian Cancer enkawlna an mamawh angin dah tum a ni a, staff quarter hlui tak takte pawh Master Plan mumal tak siamin sak that thuai tum a ni a ti. Mizoram sorkar-in Morgue Van leibelh a tum atangin Lunglei pawhin 1 chu an chan ngei a beisei thu a sawi.
Trade & Commerce enkawl chungchang sawiin Lunglei District Marketing Officer post hun rei tak hnawhkhah lova awm pawh hnawhkhah thuai tum a ni a ti a. Sports Minister hmalakna in sports lamah pawh hmelthar hmuh ngei a beisei awm thu a sawi bawk.
vawiina Pu S. Laldingliana hmuhna ah hian chanchinbu mite hi Pu Lalthangmawia Vandir, Dy. Director, I & PR in a ho a ni.
