Lunglei a cham mek Parliamentary Secretary Sports & Youth Services/Health Department Pu S. Laldingliana chuan vawiin khan a bial chhung Theiriat khua ah Khuallian niin YMA Day a hmanpui. Pu S. Laldingliana hian tukin zing dar 7:00 khan Theiriat YMA hruaitute duanlawk angin Theiriat khaw tuikhur leh a chhehvel ah thingphun hnatlang a hova, Thing tiak a phun nghe nghe a ni.

Theiriat khawtlang hian YMA Day hi urhsun takin an hmang a, Chhun lam Programme hi session hnih ah an then a, Session khatna ah hian Badminton leh Table tennis final khelh a ni a. Session hnihah hian YMA thuthlung sawi rualna leh variety programme a hun hman ho a ni. He hun hi Pu C. Vanlalngaia Vice President YMA in a kaihruai a. Khawtlang NGO hrang hrang atangin hruaitu ten thusawina hun an hmang bawk. He huna thu sawitu Pu S. Laldingliana chuan YMA hlutna leh nihphung sawiin member-te fuihna thu tha taktak a sawi a, Politics a a luh chhan ngei pawh YMA thlirna atanga tanpui ngaite tanpui theitu nih a duh vang a nih thu sawiin, \" YMA hi pawl ropui leh thianghlim a ni a, kan zavai hian YMA kan nihna anga mawi taka par vul tur leh midangte tana malsawmna ni turin ke kan pen a ngai a, tanpui ngaite i hmuhhmaih lovang u\" a ti. Hemi hnu hian Khawtlang hmasawnna leh hmachhawp kal lai mekte thlir hovin Khawtlang hruaitute nen an inkawm ho bawk.

Theiriat khawtlang hian YMA Day pualin June ni 5 khan a mamawh apiangte hman atan Lunglei Civil Hospital ah thisen Unit - 42 lai an lo pe tawh a ni.