Minister hian sawrkar tharin Parliament Secretary dinhmun a siam dan sawi langin, sawrkar tih tur pawimawh chi hrang hrang, thu pawimawh leh thuruk tawp thlenga khawih tur an nih angin India Danpui hnuaia Minister-te anga thutiam (oath taking) la thlap an ni a, Minister of State rank an ni. Sawrkar hmasaa Adviser-te ang lo takin anni hi MLA nilai vek an ni a, MLA hlawh bak sum tam tak sen belh a ngai dawn lo a ni. Tangkai zawk a hna an thawh theih nan File zawng zawng pawhin a kaltlang vek dawn a, Department Officer te pawhin an dinhmun an hriatchian a pawimawh dawn a ni. Education Officers-te chu nasa lehzuala tan la tura fuihin Mizoram tana theihtawp chhuah tur leh corruption laka fimkhur turin a chah a. Kum kaltaa School Education Budget Cheng nuai 26,000/- chu Mizoramin UT a nih tirha ram pumpui Budget let 14 zet a tling tawh a ni. School Education hnuaiah hian ruahmanna lian tham tak tak siamna tur National programme leh Scheme te a awm a, thiam taka hmalak tum a nih thu a tarlang. Minister chuan sawrkar thar chuan tum chiang tak (Mission) a neih avangin tihlawhtling tura hma a lakna kawngah mimal leh pawl huatte pawh a hlawh mai theih thu sawiin, thil tha leh dikah chuan huai takin a kal dawn a, a department enkawl officer te, sawkar hnathawk leh mipuite pawh tawiawm turin a sawm a ni.

Pu Chawngtinthanga, Parliamentary Secretary, School Education etc. pawhin thu sawiin, School Education Department chu Department lian a nih avangin Streams/Wings hrang hrangte thawhho thiam tul a tih thu a sawi a. He Meeting-ah hian Central Budget atanga sum tam zawk hai chhuah dan turte, Department Annual Budget indaih lohna phuhruk dan turte, SSA leh RMSA chungchang te pawh zau taka sawiho a ni.