Vawiin chawhma khan Saikuti Hall Lunglei-ah MHIP Sub-Hqrs. Lunglei buatsaihin Tiranga do beihpui hawnna Pu S. Laldingliana, Parliamentary Secretary in a nei.

Hawnna thu sawiin Pu Dinga chuan Mizo te hi North East state ah ziak leh chhiar thiamna lamah India ah 2 na kan nih rual hian hriselna lamah kan hniam em em a,  tan kan lak a ngai a ni a ti. Kan ramngawte nise duh tawkin kan vatin kan hal a, nungchate nise duh tawk man mai lovin turin kan hrai hlum a, hetiang thil tih hi kan bansan a hun tawh a ni a ti. Zuk leh hmuam lamah nise a ti nasa ber niin cancer vei tamna ber state kan ni te hi a zahthlak hle a ni a ti bawk. Kristian state in ti si hian mipat hmeichhiat hmanna kawngah kan in thlahdahin HIV/AIDS hluarna state kan ni tan mek a, heng avang pawh hian tan kan nasat a ngai a ni a ti.

Sports Discipline hrang hrangah theih tawpin tan kan la mek a, chumi ti hlawhthing tur pawh chuan insum theihna leh zuk leh hmuama fihlima self discipline neih a ngai a ni a ti. Coach leh Trainer-te pawh an in sum a, naupang trainee-te entawn tlak a an nun a ngai a ni a ti bawk. A tawp berah chuan vawiina MHIP in programme an buatsaih ang hian Tiranga do beihpui thlakna ah hian kan zavaiin kan tel a. A lo hlawhtlin theih nan leh kan hneh ngei theih nan theih tawpa tanla theuh turin kal khawmte a ngen.

He hunah hian mi thiam bik Dr. Lalramzauva, Medical Supdt., Serkawn Christian Hospital in Tiranga that loh zia sawina a nei a, Dr. S.R. Ngurchamliana, Sr. Specialist (Medicine) Civil Hospital, Lunglei-in Tiranga in a natna a thlen theih leh a kaihhnawih chi hrang hrang a sawi a, Dr. Jane Ralte in zuk leh hmuam that loh zia te power point presentation hmangin sawifiahna a nei bawk a ni.