April Ni 5 khan 36th Young Chakma Association Annual Conference kharna chu  Kamalanagar Playground-ah Pu S.Hiato, Hon’ble Minister Tourism, PHE etc. leh Pu N.K.Chakma, Minister of State, A.H & Vety. etc. ten an hmanpui. YCA Conference hi 3rd-5th April, 2012 chhunga hman a ni.

Khuallian Pu S. Hiato chuan Chakma thalai kalkhawmte chu Mizoram sorkar atanga hmasawnna tur sum leh pai an dawnte dik taka hmang turin a fuih a, Central Scheme hrang hrangte pawh hmang tangkai lehzual turin a chah a ni. Pu S.Hiato chuan inkalpawhna kawng dinhmun a hmuh dan leh enkawl that a ngaihzia te, siamtha tura Mizoram sorkarin hma a lak mek thu te a sawi a, Chawngte leh Diltlang inkar kawng pawh black top vat ni thei se a duh thu leh a rang lama hmalak tum a nih thu a sawi. Environment humhalh leh ramngaw siam kawngah tan lak a tul thu sawiin, chhuan lo awm zel turte tana chenna tlaka siam turin thing phun leh a awm sa te humhalh a ngai tih a sawi a, tui hnianghnar zawka hmuh theihnan Sorkarin hma a la mek tih a sawi bawk. Pu S. Hiato chuan Chakma ten zirnaah hma an sawn zia sawi langin ruihtheih thil laka fihlim tur te, ruihhlo dona kawnga nasa zawka hma la turtein a fuih a ni. Mizoram chhunga hnam hrang hrangte Mizo nihnain min khaikhawm tih leh Mizoram chhunga chengten ram hmangaiha in ti mikhual lo leh tlang nel taka ram tana tan ho a tul tih a sawi bawk.

Pu S. Hiato hian YCA hman atan P.A. Set 1 leh tingtang 1 a pe a. 36th YCA Annual Conference kharna hunah hian Khualzahawm Pu N.K. Chakma leh Central YCA hruaituten thu an sawi bakah cultural item hmuhnawm tak tak entir a ni a, YCA Life Member leh Doner Member te certificate hlan an ni bawk.