24/2023-2024

Champhai, the 4th April, 2023: Law & Judicial Minister Pu T.J. Lalnuntluanga, Champhai South bialtu MLA chuan vawiin chawhnu khan MHIP Hringlangtlang Block Conference hmasa ber, Mualkawi Community Hall-a neih chu khuallian niin a hmanpui.

Khuallian Pu T.J. Lalnuntluanga chuan MHIP Hringlangtlang Block Conference hmasa ber hmanpui tura sawm a ni chu lawmawm a tih thu sawiin, conference hun nuam leh hlawkthlak tak an hmang thei chu a lawmpui thu a sawi a. Sub-Hqrs. MHIP Champhai member zinga India rama tribal hmeichhiate dinhmun chawikan kawnga thawhhlawk zual 'Women Achiever' 75 thlanchhuah zinga tel pha Pi Laldinngheti, Champhai Bethel Veng a awm leh member-pui ten ngaihlua chawimawina chang an hria chu fakawm a ti a. Khawvel changkang leh thang zelah hnam dang tihdan leh nunphung lak chhawn a hluar tawh thu sawiin, hnam nunphung, ziarang leh sakhuanaten pawlh dal an tawh loh nana zahawm taka chawilar thintu MHIP te hmalakna ropui a tih thu a sawi a. MHIP member kalkhawmte chu pasal fanaute ngaihsak a, nun kawng hrisel leh tha zawm thei tura pui tur te, chhungkaw hlim leh rinawm din tura zirtirna tam zawk nei turtein a fuih a. Midangte tana phut let nei hauh lova hna an thawh thinte chu chhawmnung zel tur leh, mite thil tihah buai mai lova, ram leh hnam dam nana phut let nei hauh lova thawk zawk thin turtein a chah bawk.

Law & Judicial Minister chuan hmeichhiate chu chhungkua, khawtlang leh ram leh hnam innghahna lungphum pawimawh tak an nih thu a tarlang a. Hmeichhiate chu khawvel inrelbawlna tha zawk leh dinchhuah theih nana pawimawh hmasa berte zinga mi, chhungkaw tin khaidingtu leh a laimu pawimawh berte an nih thu pawh sawiin, chhungkaw kalzel dan tur chu nute kutah thui tak a innghat tlat a ni, a ti a. Chhungkaw hlimin khawtlang, kohhran leh ram dinhmun thlengin a chawikang thei a ni, a ti bawk a. Kan chhungkua kan dam em tih chu inzawh fo a tul thu sawiin, chhungkua a dam hmasak phawt hian ram leh hnam a dam chauh thin a ni, a ti a. Kalkhawmte chu midangte tana malsawmna ni tura an inpekna leh thahnemngaihnate tipung zel tur te, dik tak leh rinawm taka thawk turtein a sawm nghal bawk.

He hun hi Pi C.Ramhmingthangi, President, Hringlangtlang Block MHIP chuan kaihruaiin, Pi C.Lalhmingsangi, Mualkawi Branch chuan hunserh a hmang a. Din a nih atanga vawiin thlenga member boral 11 te sunna hun hman a ni a. Khualzahawm Pu T. Rochhuangkima, President, Vanhnuailiana Group YMA, Pi Lalhmachhuani Varte, President, Sub-Hqrs. MHIP Champhai, Pu Hrangsailova, VCP Mualkawi leh Pi Laldinngheti, Senior Adviser, Sub-Hqrs. MHIP Champhai te hnen ațangin thusawi ngaihthlak a ni a. Pi Lalthantluangi, Secretary, Hringlangtlang Block MHIP in report pein intihsiakna result a puang a. MHIP Sub-Hqrs. Senior Adviser Pi Laldinngheti, Women Achiever lawmman dawngtu hnenah chawimawina thuziak cheimawi hlan a ni bawk a. Pi Lalengpari, Fin. Secretary, Hringlangtlang Block MHIP chuan lawmthu sawiin hun hman hi a khar a ni.

Hringlangtlang Block MHIP hi June ni 24, 2022 khan Sub-Hqrs. MHIP Champhai hnuaia Block 3-na ni tura din a ni a. An hnuaiah hian Branch 8; Mualkawi, Melbuk, Hruaikawn, Buang, Khuangleng, Bulfekzawl, New Hruaikawn leh Dilkawn Branch te awmin, tun dinhmunah hian member 1,363 an awm mek a ni. Din a nih atanga vawiin ni thlengin tanpui ngai mi 33 te an ṭanpui tawh a ni.