Border Area Development Programme (BADP) sum cheng nuai 17 senga sak North Khawbung High School Building thar chu vawiin chawhnu khan Champhai North bialtu MLA Pu TT Zothansanga’n a hawng.

Hawnna inkhawmah thusawiin Pu TT Zothansanga chuan BADP sum hmanga North Khawbung High School Building tha tak sak ani chu lawmawm tih thu leh a hlawhtlin theihna tura tha thawhtute chu fakawm a tih thu a sawi a. Champhai District chhungah Zirna lama tan lak thar leh angaih thu sawiin, khawtinte’n mahni khua theuhah theihtawp kan chhuah theuh angai a ni, a ti a. A bial chhung khaw thenkhatah  Zirna bulthum Saptawng zirthiamna tura English Medium School din a ni chu finthlak a tiin phurawm a ti a, theihang tawka tanpuina a lo pek thin tawh thu leh puih an ngaihna zawnah chuan puih a inhuam reng thu a sawi a. Zirlai nih laia nu leh pa, Zirtirtu leh khawtlang thuawih thinte chu mihlawhtling an ni thin a ni, a ti a.  Mizo te zingah mahni thawhchhuahloh itna leh ruk mai duhna thinlung hluar zel chu a vei thu sawiin, he hri thalo tak hi rinawmna, taihmakna leh Intodelhna hmangin a hneh theih a ni, a ti.  

Khuallian chuan lehkhathiam thei apiang an hlawhtlin vek bik loh thu leh theihtawp chhuah thin mi leh teirei peihte chu a tawpa hlawhtlinna tlanga ding thinte an ni tiin, Zirlaite chu mi hlawhtling tlemte zinga mi ni ve ngei thei turin a chah a. Khawtlang tana rohlu Zirlai naupangte chu nun dan hrisel leh mawi zawh thin turin a fuih a.  Khaw thangduang, hmasawn leh Intodelh ni tur chuan Zirlaiteah bul tan a ngai a ni a ti bawk.  

Pu TT Zothansanga chuan Zirlaite chu an zirlai aia thildang dah pawimawh hmasa lo tura chahin Zirlai la peng thei thil ang chi reng rengte pumpelh angaih thu leh khawtlang leh kohhranahte pawh  Zirlai tibahlah phah khawpa inhman rih loh a that thu a sawi a. Khawtlang hruaitute pawh Zirlaite hriatthiamna nena en thin turin a chah a. Social media hman chin tawk thiam a tul thu leh nulat tlangval lamah pawh hawiherh lutuk rih loh chu a finthlak thu a sawi bawk a. Bialtu MLA chuan North Khawbung High School panna kawng thawmthatna tur Cheng nuai khat leh  School Sports atana hman tur Cheng Sing hnih school thuneitute hnena pek anih tur thu a  sawi a. Zirlai kalkhawmte chu Nu leh pa leh Zirtitirtute thahnemngaihna thlawp tlata, an zirlai theuhah thiamna tak tak zir chhuak tur leh taihmakna leh tumruhna nena beia hlawhtling tum theuh turin a chah nghal a ni.

He hunah hian Pu C.Hualrikhuma, Dy.DPC, RMSA Champhai pawhin thusawiin North Khawbung High School-in Building tha tak anei ta chu a lawmpui thu a sawi a. School building  thar chuan Zirlaite nunphung leh Zirna lamah hmasawnna thlen se a duhawm hle ang, a ti a. Sawrkarin RMSA kaltlangin Champhai District chhungah School Building 7 a sak tawh thu leh a dangte pawh sak mek a nih thu a sawi a. Tunhnaiah Champhai District chhunga Govt High School-a  Zirtirtu indaihlohna phuhruknan sawrkar hmalaknain Science teacher 12 leh Mathematics Teacher 16  dah belh anih thu a sawi a. Science leh Mathematics Contract teacher 5 te pawh dahngheh an ni a ti bawk.  Kumin October thla tawp lama Champhaiin a thlen tur Mizoram Secondary School Games, 2018 atana inpuahchaha theihtawp chhuah turin District chhunga High School-te chu a sawm nghal bawk a ni. 

Vawiin High School Building thar hawnna hun hi Pu VR Rohmuchhuaka, VCP, North Khawbungin a kaihruai a. Pu C.Laltlanliana, Secretary, Managing Committee, North Khawbung High School-in report a pe a. A duh apiangte hnen atanga thusawi tawi ngaihthlak anih hnuah Pu C.Lalneihthanga, President, North Khawbung YMA Branch-in lawmthu sawina hmangin hun a khar a ni.

Vawiina hawn tak North Khawbung High School Building hi a dung feet 60 leh avang feet 18 a zau a ni a. He school hi kum 1997 a din niin, Zirlai 34 leh Zirtirtu 6 an awm mek a ni.