Vawiin khan khawpui chhunga cheng mi rethei mahnia chenna in din thei lote tana in sak tanpuina Pradhan Mantri Awaas Yojana – Housing For All (Urban) chu Lawngtlai khawpui tan UD&PA Minister Pu Zodintluanga’n CYLA Hall, Lawngtlaiah a hawng.

Pu Zodintluanga chuan sawrkarin mi retheite hmakhua a ngai em em a, NLUP tawp dawn lamah mahni NLUP dawn hlawhtlinpui tuma tang tak takte puih zui nan NEDP pawh a duang a ni, a ti a. Mizoram hmun hrang hranga hmasawnna hna thawh chhuanawm tak tak hmuh tur awm zel zingah Lawngtlai khawpui chawm tur tui lakna GLWSS pawh peih fel tawh leh hawn thuai tum a ni tiin, Lawngtlai CYLA khelmuala phul lem phah tur paw’n sawrkar laipuiah la nawr zel a ni, a ti. A enkawl UD&PA Department chuan khawpui chhung hmasawnna mai bakah, mi retheite chawikan hna a thawh reng thu leh chumi atan chuan programme hrang hrang pawh duan a nih thu sawiin, chu’ng zinga sawrkar laipui programme pawimawh tak mai PMAY-HFA(U) Lawngtlai khawpuia hawn a ni thei tur chu lawmawm a tih thu a sawi a. Programme hlawhtlin nana thahnem ngai taka beitu UD&PA Department officer leh staff te chungah lawm thu a sawi.

PMAY in sak tanpuina chu a dawng tur dik tak chauhvin an dawn theih nan tan an lak tur thu sawiin, Pu Zodintluanga chuan induhsak bikna a awm lo vang, a ti a. A vil zui hna pawh uluk taka kalpui a, holam taka hmangte chu an dawn tawh sa chhuhsak bakah, an la lak bak instalment dang pawh pek tawh loh tur a ni tiin, hlawhchham kan phal dawn lo, a ti. A ti tha leh thawk thate chu media hmanga puanzar zel ni se a duh thu sawiin, chuti ang atana thawh hopuiah thu thar theh darhtute a sawm nghal a. A dawng turte chu thahnem ngai leh tih tak takna thinlung pua dawng tura chahin, in tha tak an neih theih nan duhsakna a hlan bawk.

He hunah hian Lawngtlai DC Dr A. Muthamma IAS chuan kal khawmte lawmna thu a sawi a. UD&PA Joint Director Pu HVL Zarzoenga’n PMAY-HFA(U) chungchang sawi fiahin, Lunglei DUDO Pu Andrew Lalhruaia’n lawm thu sawiin hun a khar a ni.

PMAY – Housing For All (Urban) hi thuang hnihin kalpui a ni dawn a. Tuna Lawngtlai khawpui tana hawn tak hi Beneficiary Led Individual House Construction niin, beneficiary-te chu Rs 1,50,000/- (nuaikhat singnga) theuh pek an ni ang a, chu chu anmahni’n Rs 50,000/- (singnga)-in an lo do ve ang. Tanpuina hi instalment thum (3)-ah, 40%, 40% & 20%-in pek tur a ni a. Lawngtlai khawpui chhunga 1st Phase atan hian beneficiary 500 thlan chhuah an ni.

Vawiin PMAY hawnnaah hian Lawngtlai khawpui chhunga officer te, VC leh tlawmngai pawl ai awh te, thu thar theh darhtu leh beneficiary thlan chhuahte an kal khawm a. Chawhnu lamah PMAY-HFA(U) chungchanga hriat tur pawmawh hrang hrang inzirtina hun hman nghal a ni.