Vawiin chawhnu khan Sports Minister Pu Zodintluanga chuan Aibawk RD Block hnuaia Phulpui khua a Sports Complex sak mek chu tlawh a, Parliamentary Secretary Pu S. Laldingliana leh Parliamentary Secretary leh bialtu MLA ni bawk Pu K. S. Thanga ten Sports Minister hi an tawiawm a. Minister, Parliamentary Secretary pahnih te, Sports & Youth Services Department-a Secretary leh Director te leh Mizoram State Sports Council-a senior officer te hian Sports Complex  hmunhma an fangkual a, hnathawh tawh chin te thlir ho a ni.

Pu Zodintluanga chuan Phulpui Sports Complex sak hna chu khaihlakna leh harsatna awm loa tluang taka sak chho mek anih chu lawmawm tiin Complex sak zawh hunah chuan a khaw mipui mai nilo Mizo thalai infiammi tam takin an chawr thei dawn a, a bikin sports camping leh coaching buatsaih nan a hmun a rem dawn a ni, a ti bawk.

Phulpui Sports Complex sak nan hian North Eastern Council (NEC) chuan cheng nuai 394 a rawn ruahman a, nikum July thla khan Complex sak hna hi tan niin kumin kum tawp lamah chuan sak zawh beisei a ni. Phulpui Sports Complex-ah hian infiamna chi hrang hrang – football, volleyball, basketball leh indoor games(badminton) te khelh theihna tur sports infrastructure sak mek a ni a; football field tur hi laihzawl a ni tawh a,  a gallery sak mek a ni a; volleyball court hi sak zawh tep a ni tawh a; basketball court awmna tur hmun laihzawl a ni tawh bakah indoor hall pawh sak mek a ni bawk.