Mizoram Legislative Assembly a Public Account Committee (PAC) chuan an chairman Pu C. Ramhluna MLA, hovin nimin 12.6.2012 chawhnu dar 3:00 leh tukin zing dar 7:30 khan sawrkar sum senga hmalak tawhna building leh khawl te an enfiah a. PAC Chairman leh member MLA Pu B. Lalthlengliana, Pu Lalduhawma, Lt.Col.Z.S. Zuala, Pu K. Lalrinthanga, Pu R. Lalrinawma leh Pu Lalrobiaka te hian Lunglei Civil Hospital a Ayush Hospital Building, Ayush OPD, May 25.2012 a hawn tak 33/11kv. Sub-Station, Electric venga mi leh Health Department hnuaia awm Incinerator (Bawlhhlawh halna), Hauruang a mi te a hmunah tlawhin an zir chiang a ni.

Ayush Building, Civil Hospital, Lunglei a mi chu a awmna hmun mipui te tan pan a awlsam loh avangin Civil Hospital ramruak kal pawh awlsam zawka sawn tha an ti a. Tun dinhmun a Ayush Hospital a changtlun tawkloh chhanah Medical Staff te chuan Doctor tih loh sub-ordinate staff pek an nih loh vang a nih thu an sawi a. He Ayush Hospital khum 10 awmna hi dispenser, Nurse leh IV-Grade te pek an nih chuan pangai tak a kalpui nghal theih a nih thu PAC te hi an hrilh a ni. Heng an harsatna te hi PAC chuan sutkian dan kawng zawnpui an tum thu an sawi a. PAC chuan 33/11kv. Sub-Station chung changa an programme siam chu technical mi leh sa ten Audit chhanna fumfe leh felfai an siam loh vang a nih thu an sawi a. 33/11kv. Sub-Station, Electric veng ami sak a nih hma a Sub-Station dang 3 sak zawh tawh chu Audit chhanna ah tarlan ni ta se thil felsa leh enchian ngai a ni dawnlo ani an ti bawk.

Tukin zing dar 7:30 khan Hauruang hmuna Health Department in bawlhhlawh a halna tur khawl an bun rawpral ta chu PAC te hian a hmun ah an tlawh leh a. He Incinerator (Bawlhhlawh halna) hi an sak zawh a enchhinna tih mai loh chu hman zuina leh enkawl zui na a awm ta lova. Rs.55lakh. senga sak khawl part hrang hrang dynamo, belts, wire leh Switches te chu ruk bo vek a nitawh a. He khawl hi Lunglei Civil Hospital atang a hlat deuh avangin hman theih a nilo ni in medical staff te chuan an sawi a ni. Remchang hmasa ber ah Civil Hospital hnaih zawk a sawn chhuah chu kawng awmchhun ah PAC chuan a ngai a. Medical staff te chuan he khawl hi Rs.25lakhs. chuang senga sawn a ngaih tur thu an sawi. Lunglei khawpui a khawl hi bun a nih loh chhan ah, intih thaihna leh thu dik tawklo chanchinbu kaltlang a thehdarh chu Medical staff ten an hmehbel thu an sawi a ni. MLA te chuan he Incinerator (Bawlhhlawh halna) hi Civil Hospital bula dah loh chuan a hmantlak dawn loh thu sawiin mipui vantlang pawn ahimtawk na leh atangkai zia belchiang turin an ngen a. He khawl khu hi vawitam tak filter hnu ah tih chhuah a nih avangin hriselna atan pawn thilpawi thlentu a ni lova. Kan tlangram lo hal te hi kan hriselna atan a thil pawi zawk leh ram tha awmze neilova suat ralna a nih zawk avangin mipui ten kan bansan zel a tul zawk a ni a ti. PAC te chuan sawrkar sum mipui tana tangkai lo zawng a senral vak vakna hi bansan a tul a. He thil ah hian official te remruat na a ngai a ni an ti.

Public Account Committee member te hi I&PR staff ten an tawiawm a ni.