Mizoram Football chanchin a thil chhinchhiah tlak leh lian tham ber tura ngaih Mizoram Premier League atana thawhhona thuthlung chu Mizoram Football Association leh Zonet Cable TV Private Ltd. chuan vawiin khan I&PR Auditorium ah an ziak fel ta. MFA aiawhin an President Pu Lal Thanzara, (Parliamentary Secretary to Chief Minister) leh Zonet Cable TV Director Pu R.K. Lianzuala ten hming an ziak a, Director of Sports Pu Lalzirmawia Chhangte leh AMC Councillor Pu Lalrinenga Sailo ten an hriatpui a ni. Pu Lal Thanzara leh Pu R.K. Lianzuala te hian MPL chhinchhiahna tur (Official logo) - Selu lem an tlangzarh nghal a ni.

Thuthlung ziak puala inkhawm, Pu Francis Paul kaihhruai ah hian MFA President Pu Lal Thanzara chuan Football khel thin te tana chanchin tha lawmawm tak a thleng a ni a ti a. Thalai hmakhaw thlir a Zonet Cable TV te inpekna chu fakin rah duhawm taka a chhuah ngei a beisei thu a sawi a. Football tihhmasawnna tura MFA in hma thlir leh duhthu sam thuai tak a neih te chu sum leh pai harsatna avanga tihhlawhtlin a harsat thu leh an innghahna ber chu sorkar a nih thin dan te, dan leh hrai inkaihhruaina fel tak a awm avanga duh thal a sorkar atanga tanpuina an hmuh theih thin loh thu te sawiin MSACS te nen Red Ribbon Tournament lian tham tak buatsaih a nih thin ah lawmthu MFA President chuan a sawi a ni.

Zonet Director Pu R.K. Lianzuala pawhin infiamna hmunhma tha leh changtlung zawk nei lo leh Mizoram chhung ngei ah Football inelna lian tham buatsaih a nih theih loh laia Mizo thalai 200 chuang zetin eizawn nana an hman theih avang hian Zonet chuan hetiang lama hmasawn tura hmathlir a neih dan te a a sawi. Football chu eizawnna kawng tha a nih thu leh ram leh hnam humhalh nan pawh thil tangkai a nih beiseiin Zonet chuan MFA nena thawhdun za a rel ta a ni a ti.

Football Team 8 telna tur Mizoram Premier League chu September thla chawhnu lamah tan theih beisei a ni a. Hemi atana sum senso tur Cheng nuai 25 chu Zonet Cable TV hian a tum ang a, kum 5 chhung nuai 25 aia tlem lo kumtin a thawh dawn a ni. Thuthlung ziak tak tlangpui hi MFA Hony Secretary Pu Lalnghinglova Hmar chuan a hrilhfiah zui bawk.

Vawiin a thawhhona thuthlung ziak inkhawm ah hian MFA hruaitu hlui Pu K. Liantlinga, MLA leh Mizoram Sports Council hotute pawh an tel.

(Thuthlung chichiar IPR Press Hand Out ah en rawh)