2388/2023-2024

Pachhunga University College, Post Graduate zirlai, Students Council leh Directorate of Election te ṭangkawp chuan vawiin khan PUC Seminar Hall-ah  "Young Voters' Education" leh 'Political Talk' an buatsaih.

Chawhma programme hi Young Voters' Education programme atana hman a ni a, hetah hian Election Directorate aṭangin Pi Lalchhanhimi, Asst. Commissioner, Aizawl chuan "EVM, VVPAT leh Model Code of Conduct' chungchang a sawi a. Pi Jennifer Vanlalhruaii Pachuau, BDO, Tlangnuam chuan, 'SVEEP leh IT application' chungchang a sawi bawk. Zirlaiten an hlawkpui hle.

He zir hona programme hi Dr. H.Laldinmawia, Asst. Professor and Head, Department of Mizo (UG and PG) chuan a kaihruai a, Prof. H.Lalthanzara, Principal, Pachhunga University College chuan thu sawiin, 'Ram leh hnam siam ṭha tak tak turin ram hruaitu ṭha, leader ṭha thlan a pawimawh a ni," a ti a. Zirlaite chu vote thlak vek turin a sawm bawk.

Chawhnu lamah Political Talk an buatsaih a, hetah hian Congress party aiawhin an President Pu Lalsawta a tel a, MNF aiawhin Pu Lalruatkiama telhin ZPM aiawhin Dr. Lalmalsawmzauva te an tel a, he talk show hi Pu Lalthlamuana Ralte, Department of Economics chuan a kaihruai thung a ni.

Pachhunga University College-ah hian Post Graduate department panga - Mizo, Philosophy, Life Sciences, Geo-Physics leh Applied Mathematics and Statistics department te an awm a. Zirlai 104 an awm mek. PUC-ah hian doctor zir mek, Ph.D scholar 100 vel lai an awm mek bawk a ni.