Vawiin khan Mizoram PWD hotute leh kawng enkawltu Divisional Officers zawng zawngte’n, Principal Secretary, PWD kaihhruaina in Engineer-In-Chief, Conference Hall ah Road Maintenance chungchangah meeting an nei a. He meeting ah hian PWD enkawl kawng siamthat mek leh hmalak zel dan tur te sawiho a ni.
Meeting kaihruaitu Pu Lalram Thanga, Principal Secretary chuan kumin fur ruahtui kum dang aia a tam avangin Mizoram leh North East State dangah kawng chhia a tam hle a, Mizoram PWD kawng enkawlte pawh a chhiat nasat hle thu a sawi. Truck lian phurrit tak tak phur, kawngin a dawl tur (Design load) aia sangin a zawh tam tak hle thu leh chu chuan kawng a tihchhiat nasat thu a sawi a. Hemi chungchangah hian Transport Department te nen pawh tan lak ho tula a hriat thu a sawi bawk. Principal Secretary chuan Road Maintenance Policy siam fel a nih tawh thu leh Road Fund Board pawh siam a nih tawh thu sawiin, Road Fund lakkhawm dan tur pawh ruahman mek a nih bakah kawng enkawl nan hian sum tam zawk hmuh beisei a nih thu a sawi a. Kawng enkawl hi uluk leh tha zawka thawk turin tan lak a ngaih thu leh EE, SDO leh JE ten a hmunah tun aia hna vil ngun a tul thu a sawi bawk.
Tunah hian Mizoram PWD hnuaiah kawng enkawl mek 6127.81 kms (National Highway-1465.12 kms, State Roads-4662.69 kms) a awm a. Heng enkawl hna hi chi thum - (1) Normal Maintenance (2) Periodical Maintenance leh (3) Emergency Repair/Maintenance te a then a ni. Meeting-ah hian Road Maintenance Action Plan anga Division tinin khaw that veleh a hna an thawh dan tur leh sum ruahman te sawiho a ni.
