Vawiin ah khan PWD Minister Pu Lal Thanzara chuan Rangvamual hmuna leimin National Highway 44A hnawhping thintu, PWD National Division III hnuaia contractor ten a thenfai leh lungrem tur hna a thawh mek a endik a.UD&PA Minister Pu Zodintluanga, DM&R Minister Pu C. Ngunlianchunga, Dr. K. Beichhua, MLA, DM&R Principal Secretary Pu P.C. Lallawmsanga, Aizawl D.C. Dr. Franklin Laltinkhuma, Engineer te leh Geologist te bakah sawrkar mi pawimawhte pawh PWD enkawl hnathawh a hmun ah an en a ni.

Rangvamual kawnga leimin hi contractor ten tunhnai khan PWD National Highway Division III kaihruaina hnuaiah an thianfai a. Lungrem mai theih a an buatsaih tawh hnu in nimin a ruahsur khan leimin thar a siam belh a, helai hmun official ten an en lai pawh hian lungtum lian tham fe fe a rawn lum zeuh zeuh reng a ni.

PWD Minister Pu Lal Thanzara hian Engineer te hi an hnathawh kalpui tum dan leh hmasawnna te a zawt a. Helai kawngpui hi Mizoram tan a pawimawh em avangin indaihlo tak chung pawhin sawrkarin him taka lirthei te an tlan tlang theih nan siam a duh thu a hrilh a. Contractor hnathawh te uluk taka vil reng tur leh an harsatna te a hnenah thlen vat thin turin a hriattir a ni.

Rangvamual leimin thenfaina tur leh lungremna tur hian Rs.1.39 crore ruahman a nih thu Pu Henry Lalmuankima, S.E., PWD chuan sawiin leimin thar leh leikhi thar lam hlauhthawnawm a rawn awm leh tak avang erawh chuan an sum ruahman zat hi ennawn leh a ngaih tur thu a sawi a. Leimin thian fai tur hian leivung 50,000/- Cubic meter deuh thaw an paih thu sawiin kawngpui dung zawl chin aia sangah 6 metre a zau chhawrdawh an siam atangin 3 metre a sang Gabion Wall ( thirlen a lungphuarkawm) rem an tum a ni. Leimin belh leh leikhi thar lam thual mam hna hi tan leh thuai tum a ni tih Aizawl D.C. Dr. Franklinin Laltinkhuma chuan sawiin NH 44A kawngpui pawh hi tun kartawp lamah chuan khar leh tum a ni a ti.