PWD Minister Pu Lal Thanzara chuan vawiin khan Thingdawl high school complex ah PWD National Highway Division-V a hawng.

Hawnna inkhawm ah hian Minister chuan thu sawiin NH Division Office thar hawn theiha a awm chu lawmawm a tih thu a tarlang a Thingdawl mipuite tan pawh kawng hrang hranga malsawmna thlentu a nih beiseiin a lawmpui thu a sawi bawk. Thingdawl khua chu an vanneih thu sawiin an khaw chhungah Sawrkar in hmalakna hrang hrang a nei a, Thingdawl Nursing School bakah hmalakna hrang hrang a kal chho mek ani tiin thingdawl mipuite chu Sawrkar Department hrang hrangte tha taka thawhpuiin a tul na ah hawihhawm taka finchhuah zel turin a chah bawk a ni. Social Media hman fimkhur a ngaih thu sawiin thudik hrechiang lova thehdarh vak vak mai chu bansan a hun tawh ani tiin thudik hriatchian tum hmasak hram hram a tha a, selna leh in demna ringawt ai chuan rawtna leh infinchhuahna hi ram hmasawn nan a tangkai zawk a ni a ti. Mizoram chu leilung naupang tak, lei hnip tak a ni tiin duh vang reng ni lova khuarel chhiatna thlen changin kawngpui leh lei dawh teh alo chhe palh thin a, heng hunah te hian in tawngpawng sel ngawt lovin kal hmang tha zawk emaw hmalak dan tur tha zawk hria tan pawh hawihhawm taka in finchhuah zel nise chung rawtna leh infinchhuahna ngaithla tur chuan Sawrkar chu a in hawng reng ani a ti.

PWD chu mipuite beisei phak loh chang an nei thin a, fakna thu lam aiin selna anka an dawng tam zawk ani tiin heng te hi a neitu PWD Officer leh Staff te chung lung lova la mai lovin mipui leh ram tan theihtawp chhuah a thawk chhunzawm zel turin PWD Engineer leh Staff te chu a chah a ni. Minister chuan kan kawngpui te chu tha zawka enkawl a nih theihnan tun hnai ah PWD leh Central YMA chuan thawhhona thuthlung an ziak a ni tiin hei hian nasa takin hmasawnna a thlen ngei  a beisei thu a sawi a, kawng hi a enkawltu chu PWD ni mahse, kawngpui chu Sawrkar ta ani mai lova a chhawrtu leh a mamawhtu chu mipuite kan ni a, chu vangin kawngpui chu duat tak leh uluk taka enkawl chu mipuite mawhphurna a ni tel ve ani tiin mahni zawna tan lak theuh a pawimawh a ni a ti.

National Highway Division-v hi Lawngtlai a multi modal Division-2 ni thin kha a ni a, Lawngtlai Multi Modal project chu a tam zawk thawh zawh ani a, Kolasib PWD division chu Mizoram a PWD Division lian ber pawl leh hna ngah ber pawl an nih avangin Thingdawl ah sawn a ni a. Tun dinhmunah Mizoramah hian kawngpui km 7500 vel a awm a, PWD in km 6000 vel enkawl mekin, BRO in km 900 vel an enkawl a, mizoram ah National Highway km 1410.5 a awm mek a ni.

He hun hi Pu Lalram Thanga, IFS, Principal Secretary, PWD in a kaihruai a, PWD E-in-C Er.R vanlaltluanga bakah PWD Engineer te leh Kolasib District Deputy Commissioner Dr.Arun T bakah Officer hrang hrangte leh Kolasib leh Thingdawl khawtlang hruaitute an kalkhawm a ni.