Social Justice and Empowerment changtu Union Minister of State Pu Krishan Pal Gurjar chu vawiin khan Aizawl a lo thleng a. Mizoram sawrkara Social Welfare Secretary Pi K. Vanlalrawni leh Director Pi Laldikkimi ten a thlenna Raj Bhavan-ah an hmu.

Rualbanloten sawrkar atanga an dawn tur dik tak an dawn theih nan sawrkar laipui chuan ram puma hman theih tur identification card a siam sak a. Hetiang card siam tur hian doctor te leh department hotuten a hmunah kal chilha endik a tul thin avangin thingtlang kil khawr zawk kalna tura an mamawh te SWD hotute hian an thlen a. Accessible India Campaign hnuaia Mizoram sawrkar building engemawzat rualbanlote kal theihna turin lift emaw ramp emaw siam belh tuma hmalakna a puitlin theih nan sawrkarin sum a mamawh belh te pek chhuah thuai a nih theih nan Minister hnenah hian an thlen bawk a ni. 

Heng bakah hian bengngawng te tana bengdar tha chi vuah (cochlear implant) chungchang leh mitdel hawrawp chhutna tur Braille Press dilna te Union Minister hnenah hian an thlen a. Heng an dilna te hi Minister hian ngai pawimawhin enzui a nih tur thu a hrilh a ni.