Vawiin khan Quit India Movement kum 75-na puala Exhibition “India ram thar kan siam ngei ang” tih thupui hmanga buatsaih chu Aizawl DC Dr. A Muthamma IAS in Kulikawn YMA Hall-ah a hawng a. He hunah hian Pu Lalhmachhuana Director, Geology & Mineral Resource Department chu khualzahawm a ni. 

Khuallian Aizawl DC Dr. A. Muthamma chuan thu sawiin Quit India Movement kum 75-na puala exhibition neih a ni chu lawmawm a tih thu a sawi a. Exhibition hi ram hruaituten theihtawpa India ram zalenna  an lo sual chhuah dan leh tuna sawrkar laipuiin hmasawnna tura program leh project  a kalpui hrang hrangte inhrilhhriatna atana pawimawh tak a ni, a ti a. Dr. A. Muthamma chuan kan zalenna sual chhuahna kawnga harsatna ram hruaituten an lo paltlangte leh tuna sawrkar laipui hmalakna hrang hrangte zirchianna atan exhibition chu hmang tangkai turin school leh college zirlai hawnna inkhawma kalte a chah nghal a ni. 

Khualzahawm Pu Lalhmachhuana Director, Geology & Mineral Resources Department chuan thu sawiin exhibition chu mipuite tan ram history inhrilhhriatna leh zirhona hlawkpui awm tak a nih ngei a beisei thu a sawi bawk a ni. 

Quit India Movement kum 75-na puala exhibition hawnna inkhawmah hian Pu Amlan Paul, General Manager, OIL Kolkata Office chuan kalkhawmte lawmna thu a sawi a. Pu  Rupjyoti Phukan, Chief Manager (Admin-Basin) OIL chuan lawmthu sawina in hun a khar a ni. 

Exhibition-ah hian India ram zalenna sualchhuah dan chanchin leh tuna sawrkar laipuiin scheme leh project a kalpui hrang hrangte chu hmuh leh hriat theih tura pholan a ni a. Exhibition hi Ministry of Petroleum & Natural Gas hnuaia Oil India Limited (OIL) leh Ministry of I&B tangkawpin Ministry of Parliamentary Affairs aiawha an buatsaih niin September ni 12 atanga ni 14 thleng awh tur a ni.

 

Attachment

  • Loading attachment...