267/2023-2024

Aizawl, the 30^th April 2023: Vawiin khan Prime Minister Narendra Modi in Radio leh Media dang kaltlanga thu a sawi thin, Maan Ki Baat chu a vawi 100-na (100^th episode) atan tih chhuah a ni a. Hemi pual hian Prasar Bharati (DDK) chuan Ministry of Information & Broadcasting ruahmanna a rawn duan angin Raj Bhavan-ah Program a buatsah a. He hunah hian Governor Dr Hari Babu Kambhampati chu khuallian a ni.

Prime Minister Narendra Modi in 100^th episode of Maan Ki Baat puala thuchah a sawi ngaihthlakin bul tan a ni a. Hemi hnuah hian Governor Dr Hari Babu Kambhampati chuan Maan Ki Baat Program a Mizoram chungchang a sawina leh hmalakna tha deuh a tarlan kaihnawiha hmalatu pahnih Pu CL Ruala, Ex-MP leh Save Chite Lui Coordination Committee te a chawimawi a (Save Chite aiawh hian Pu Rochamliana, GS, Save Chite Lui Coordination Committee leh a thawhpui ten chawimawina an dawng). Hemi zawhah hian Governor chuan MKB 100^th Episode puala thuchah a sawi chhunzawm a ni.

Governor Dr Hari Babu Kambhampati chuan Maan Ki Baat chu Prime Minister thusawi a ni mai  lova, Prime Minister in he thusawi kaltlanga mipui nawlpuite nena  inlaichinna thuk tak a siam na a ni a ti. MKB chu vawi 100 chhuah a ni tawh a, hemi chhung hian mi tam takin India ram hmasawnna atan Prime Minister hmathlir te tawmpuiin an theihna zawnah hma an la a. MKB vang hian mi hlawhtling tak tak – midang te eizawnna siamtu, environment siamthatna atana midangte hmahruaitu leh hmasawnna kawnga bul tana, hlawhtling chho mek tam tak an lo chhuak tawh a ti. MKB chu India ram chhung kaihnawih chauh sawi na a ni lova, heta tang hian  khawvel ram hrang hrang te thawhhona leh issue pawimawh zual te sawi a ni thin bawk a ti.

Full speech of Governor  (Link) : https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-special-screening-of-the-100th-episode-of-mann-ki-baat-at-durbar-hall-raj-bhavan-aizawl-on-30th-april-2023

Vawiina Maan Ki Baat 100^th episode puala program-ah hian Governor chuan India rampum huapa chawimawna sang dawngtute leh mi pawimawh sawmbik te a nei a. Official lam atangin Lady Governor Dr Jayashree Kambhampati leh sawrkar mi pawimawh rual te an tel bawk a ni.