3908/2023-2024

Aizawl, the 20th February, 2024: Vawiin chawhnu dar 3:00 khan Durbar Hall, Raj Bhavan-ah 'Ek Bharat Shreshtha Bharat' hmalakna hnuaiah Mizoram Governor Dr. Hari Babu Kambhampati chuan Mizoram leh Arunachal Pradesh State-te pualin Foundation Day lawmna hun a buatsaih.

He hunah hian Governor Dr. Hari Babu Kambhampati chuan kum 37 kaltaah Mizoram leh Arunachal Pradesh-te chu India ram State 23-na leh 24-na atana puan a nih thu sawiin, Foundation Day lawm tura State pahnih aiawha kalkhawmte Raj Bhavan-ah a lo lawm thu a sawi a. Kum 20 dawn rambuai a nih hnuah June ni 30, 1986 a Sawrkar laipui leh Mizo National Front te'n inremna thuthlung Peace Accord an ziak a, hemi hnu February ni 20, 1987 ah Mizoram chu State puitlinga hlankai a ni, a ti a. State a nih hmain harsatna hrang hrang tawk bawk mahse tuna pawimawh ber chu India ram State zinga ralmuang ber a ni thei hi a ni, a ti bawk.

British rorelna hnuaia awm hun ata tawh kum 1972 thlengin Arunachal Pradesh chu North East Frontier Agency (NEFA) ti a vuah nih thu leh hemi kum January ni 20, 1972 ah Union Territory-a hlankai niin Arunachal Pradesh ti a thlak a nih tak thu a sawi a. State of Arunachal Pradesh Act, 1986 hmangin India State 24-na ni turin February ni 20, 1987 ah State puitlinga hlankai a nih thu sawiin, State mawi tak ecology hausa tak a nih thu a sawi bawk.

Governor chuan sawi chhunzawmin, Mizoram leh Arunchal Pradesh-te'n International border thui tak an neih thu leh Mizoramin Myanmar leh Bangladesh, Arunachal Pradesh-in China, Bhutan leh Tibet-te a neih thu tarlangin, hemi a nih avang hian State pahnihte'n ram venhim leh inpumkhatna siam kawngah mawhphurhna lian tak an neih dun thu a sawi a. Mahni mihring puite chunga ngilneihna hloh chuang lova ram hmangaihna leh venhim kawnga dingngheh tlat a tul thu sawiin, India khua leh tui kan nih theuh avangin kan chenna ram venhim hi kan zavaia mawhphurhna a ni, a ti bawk.

India ram State leh UT hrang hranga cheng mipuite inkarah inpawhna tha zawk leh inunauna tha zawk siam a nih theih nana Sawrkar laipui programme Ek Bharat Shreshtha Bharat hnuaia hmalaknate tarlangin, hemi chhawmnung tur hian theihtawp kan chhuah tlan a ngai a, vawiina State dangte hun pawimawh kan inlawmsak tawn pawh hi hemi hnuaia hmalakna hlawhtlinna tarlangtu pakhat a ni, a ti a. Khua leh tui kan nih angin kan ram chhunga hnam ziarang hausa tak hi kan hriat chiana kan inzahsaktawn a pawimawh hle a ni, a ti bawk.

He hun hi Pu Lalngaihzuala, PS to Governor-in kaihhruaiin program buatsaih chhan a sawifiah a. Arunachal Pradesh Governor Lt. Gen. K.T. Parnaik, PVSM, UYSM, YSM (Retd.) video message ngaihthlak niin Arunachal Pradesh State chunchang video clip thlirho a ni a. Prof. H. Lalthanzara, Principal, Pachhunga University College (PUC) leh Pakbom Koyu, General Secretary, MZU Students' Council-te'n thu an sawi bawk a. State pahnih zirlai MZU leh RIPANS atanga tel ten hnam lam leh zai mawi tak tak an entira, hun hlimawm tak hmanho a ni.

Northeast Areas (Reorganisation) Act, 1971 hnuaiah kum 1972 khan Mizoram chu Union Territory (UT) a puan a ni a. India ram Danpui siamthat vawi 53-na, 1986 hnuah India ram State 23-na ni tura hlankai a ni. Arunachal Pradesh hi North-East Frontier Agency (NEFA) tia koh niin, kum 1972 khan NEFA chu Union Territory (UT) ah hlankai a ni a. February ni 20, 1987 khan India ram danpui siamthat vawi 55-na, 1986 hnuah India ram State 24-na a ni ta a ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte Foundation Day chu Raj Bhavan, Mizoramah Governor kaihruaiin a lawmna June, 2023 atang khan buatsaih tan a ni a; vawiin thlengin State 19 leh UT zawng zawngte Foundation Day lawmna neih tawh a ni.