India ram hruaitu ropui, Rajiv Gandhi hming chawia sak tan mek, Aizawl Mualpui a Rajiv Gandhi Sports Stadium Lungphum chu vawiin khan UPA Chairperson Sonia Gandhi chuan a phum ta. He lungphum phumna inkhawm buatsaihah sorkar hotute leh mipui an kal tha hle a ni.

 

Pi Sonia Gandhi chuan Mizote chu boxing ah te, martial arts ah te leh archery ah te talent nei tha tak in ni tiin, infiamna chi dang dangah pawh Rajiv Gandhi Stadium hian an talent neihte cho chhuaktu anih ngei a beisei thu a sawi a. Rajiv Gandhi kha thalaite hmakhua veitu anihzia sawiin, Mizote pawh ngaipawimawhin, in mamawhte pawh a hre hle a ni a ti a. He stadium tur hi zawh anih hunah chuan infiamna hrang hrang atan hman chhoh anih zel theihna turin enkawl chhoh zel a ni ang a ti a. He infiamna tual hian Mizoram leh India tan ropuina thar a paw chhuak ngei ang tih a beisei tlat thu a sawi bawk a ni.Sonia Gandhi chuan UPA sorkarin state ah leh centralah te a thil tum a tarlante chu tih puitlin vek a tum dawn thu sawilangin, NLUP pawh tih puitlin ngei a tum a ni a ti a. India ram inpumkhatna tha zawk neih theihna kawngah Mizoram chu remna leh muanna nei anih avangin entawntlak leh hmahruaitu a ni a ti a. Mizorama Medical leh Professional Institute din tur thuah pawh ka thlawp tlat a ni a ti. Mizoram hmasawnna hi India ram hmasawnna a ni a ti.

Chief Minister Pu Lal Thanhawla pawhin thu sawiin, kum 1986 a Rajiv Gandhite chhungkua an lokal tuma Mizo thalai ten ‘world class infiammi kan neih theihna turin world class stadium min pe rawh’ tia au hla an neih kha Sonia Gandhi in ala hriat reng a rin thu a sawi a. Chuvangin he project hi Rajiv Gandhi chhanna leh kan thalaite awh em em rawn tipuitlingtu tur anih ngei a beisei thu a sawi a ni.

India rama chhungkaw entawntlak, mirethei leh chanhaite chawikan duhtu an nih angin, Mizoram mipuite chuan Pi Sonia Gandhi chu kan ngaisangin kan zah em em a ni a ti a.  Assembly leh Village Council inthlan hnuhnung bera hneh taka chakna kan chan chhohna chhan pakhat pawh Pi Sonia Gandhi kaihhruaina vang a ni tiin, a beisei ang ngeia thawk chho zel turin theihpatawp kan chhuah reng dawn a ni a ti a. Sum lam leh kawng dang tinrenga min puih tawh thin angin hun lokal zel turah pawh a thlawpna an beisei reng tur thu a sawi bawk a ni.

Pu Lal Thanhawla chuan a sorkar programme lian ber NLUP chu inpawh leh hmasawnna rualkhai taka kalpui te, miretheite chhanchhuahna tur anih bakah ramngaw humhalha boruak tha siamtu anih theih dawn bawk avanga central sorkar pawhin tha an tih pui thu a sawilang a. Hetah hian Pi Sonia Gandhi thlawpna kan mamawh reng dawn a ni a ti. Chief Minister chuan kutdawh puan sin reng kan duh tawh bik loh thu sawiin, mahni intodelh hi kan thlakhlelh tawhzia leh chumi atana harsatna sitkian tur la awmte kan sutkian theih nan, nakina tanpuitu kan hin zawk theih nan tunah hian min tanpui rawh u kan ti a ni a ti. Chief Minister chuan kum 20 chhung rambuai avanga nuaichhiat tawha kan awm hnu-ah Pu Rajiv Gandhi an remna leh muanna min neih tir hi kan history ah chuan ropui takin chhinchhiah reng a nih tawh dawn ani a ti a. Pu Rajiv an fing taka min lo kaihhruai avang leh Congress min leh sa te inhlanna azarah Mizoram chu tunah Muanna Thlirkar ah alo ding ta a.He Miuanna hlu tak hi kan vawng tlat dawn a ni a ti.