Vawiin chawhma dar 10 khan Champhai DC’s Conference Hall, Keifangtlangah District Level Vigilance & Monitoring Committee for Rural Development Programmes chu Chairman, Rajya Sabha MP, Pu Ronald Sapa Tlau kaihhruaiin an thukhawm a, kumin January - March chhunga Champhai District chhunga hmasawnna hnathawh hrang hrangte thlir ho.

Meeting-ah hian Champhai District chhunga MLA pali – Champhai South bialtu Pu JH Rothuama, NIB Chairman; Lengteng bialtu Pu H. Rohluna, School Education Minister; Champhai North bialtu Pu TT Zothansanga, Parliamentary Secretary; leh East Tuipui bialtu Pu T. Sangkunga, MYC Chairman-te bakah District Bawrhsap Pu Vanlalngaihsaka, IAS, DRDA Project Director Pu CC. Lalchhuangkima, MCS te leh District leh RD Block Officers hrang hrangte bakah tlawmngaipawl aiawhte an tel kim hle.

Meeting kaihruaitu, Rajya Sabha MP Pu Ronald Sapa Tlau chuan member-te lawm paha thu sawiin District level chu hmasawnna hna, a tak taka thawhna a nih avangin officer kalkhawmte mahni inchhuanna thama hna thawk turin a chah a. Champhai District-ah boruak muanawm tak hnuaia Vigilance & Monitoring Committee neih a ni thin chu lawmawm a tih thu leh mipui aiawm MLA-ten an bial chhunga hnathawhte ngaihven a VMC an ngaipawimawh chu lawmawm a tih thu a sawi bawk. RS MP Pu Ronald Sapa Tlau chuan Champhai District mipuite chu BPL dik tak nilo chu BPL-a inchhallo ngam tur leh APL a awm inchhuang zawk tura ngenin Department hrang hrangte pawh BPL titlem tura theihtawpa tan la turin a chah bawk. Chairman hian rorel tan hmain ‘Rural Development Department Achievement Report 2014-15’ a tlangzarh bawk.

Vigilance & Monitoring Committee chuan Meeting hmasa lama rorel bawhzuina chu thlirletin tha tawkah a ngai a, hmabak la awmte chu a hun taka tihhlawhtlin a nih theih nan bialtu MLA leh Official-ten inthurualin hmalak ni se a ti a. Hemi hnu hian hian Department hrang hrangte hmalakna a mal mala thlirlet a ni.

Hmalakna hlawhtling langsar zingah MGNREGA, IWMP, Swatch Bharat Mission (Grameen), PMGSY leh NSAP te an tel a. MGNREGA hnuaiah job card nei 27,814 te tan ni 73 inhlawhna siam sak tawh niin hna tam zawk, 70% lai chu Agriculture kaihhnawihah atan hman a ni a, sawrkar laipui duhdan angin thingphun leh ekin siam lamah hmalak belh a ni a. Champhai District chhungah hian IWMP project 7 kalpui mek a ni a, heng Project-te hi ramchhung hmundang nen khaikhin pawha project hlawhtling ber zingah an tel thu tarlan a ni bawk. PMAY (IAY tia hriat thin) hnuaia hmalakna chu sawrkar laipuiin a kalphung a thlak avangin kum hmasa lam aiin a tla hniam a, kuminah hian in 45 sak zawh tawh a ni a. PMGSY hnuaia hmalakna hrang hrangte thlir ho niin chak leh mumal zawka hmalak a nih theih nan PMGSY in a huam theih chin, in 250 chin awmna khuate tan roadmap fel tak siam ni se Meeting chuan a ti bawk.

Meeting chuan pawna zun leh ek thiar awmlohna (Open Defecation Free) District ni tura hmalaknate thlirin PHE Department in mimal tan ekin 821 lai a sak tawh thu tarlan a ni a. National Social Assistance hnuaia scheme pathum – IGNOAPS, IGNWPS leh IGNDPS tanpuina dawng zat belhkhawm hi 3102 niin Chhungkaw eizawngtu boral hnena hlan thin NFBS hnuaiah chhungkaw 29 tanpuina pek a ni tawh bawk. Distric Level Vigilance & Monitoring Committee chuan zirlaite scholarship sem chungchanga harsatna awm mek chinfel thuai tul a ti bawk.

Champhai District chhunga naupang kum khat hnuailam thi zat, Infant Mortality Rate (IMR) chu 26.58 a nih thu tarlan niin hmalakna hrang hrangte tarlan a ni a. RMSA leh SSA hnuaia hmalaknate pawh Committee chuan a thlirlet bawk.