Vawiin chawhma dar 11 khan Arya Mess, Police Headquarter ah kum 2007 - 08 chhunga ral kuta thi Indian Reserved Bn. sipaite luman chu an chhungkhat hnai berte hnenah Home Minister Pu R. Lalzirliana’n a hlan.

 

 

Home Minister chuan, “Hetianga ral kuta thite luman tur police hotuten fel taka an lo ruahman lawk hi a lawmawm a; vawiin hi vanduai vanga pawisa tam tham tak kan dawn ni anih rualin ni lungchhiat thlak tak a ni” a ti. “Kan sawrkar hian eirukna leh hlemhletna kan do chho mek a, kan police-te pawh hi mahni mimal hna thawk tura kan lo chhawr thin a nih pawhin kan officer-te hian i sim ang u tiin ka sawm che u a ni” a ti bawk. Home Minister chuan Mizoram police-te chu an hna tur dik takah chhawr an tum thu sawiin, “Kan police-te hi kan chhuangin, kan thlamuanpui thin che u a, in chakna hmang hian a duh apiangin total bandh, kawngpui dan pin an huaihawt thinte hi huai takin kan hmachhawn zel dawn a ni” a ti bawk.

Vawiina IR sipai luman pekte hi 29.11.2007-a Chhatisgarh-a bomb puaka thi 2nd IR sipai 10 leh 2.9.2008-a 1st IR sipai 4, Saipum daia HPC (D) kahhlumte an ni a. Chhatisgarh-a thite hnenah hian LIC Kolkata atangin Rs 10,00,000 leh Chhatisgarh sawrkar atangin Rs 3,00,000 theuh pek an ni a. Saipum daia kahhlum Ist IR sipai chhungte hian Mizoram sawrkar atangin Rs 3,00,000 theuh an dawng a ni.

Sipai thi chhungte hnena luman hlanna inkhawm hi Pu Lalrokhuma IPS, DGP, Mizoram chuan a kaihruai a; Mizoram Police aiawhin Pu Saizela IPS, DIG (Hqrs.) chuan thu a sawi bakah, sipai thi ta chhungte aiawh pawhin thu a sawi bawk a ni.