India rama state ralmuang ber Mizoramah hian ralmuang taka thinthi a mipui te an awm chu sorkarin a duh ber tih sawiin hel lam rawngkai reng reng mipuiten an thlawp tur a ni lo, Home Minister chuan a ti. He thu hi Keifang Venglai Hall hawnna inkhawm nimin May ni 25, chawhnu-a a hmanpuinaah a sawi a ni. 

Pu R. Lalzirliana chuan khawchhak, khawthlang, chhim leh hmar atanga lokal Mizo hnahthlak te an tawng thluk a dan vang ringawtin tumah innuihsan tur a nilo, Mizoram hi  Mizo te ta, thlamuang leh him taka Mizo zawng zawng te awmna tur a ni a, he ram thendarh tum tu te erawh chu tute pawh hian kan do ngam tur a ni, a ti. Mizo hnamzia zonunmawi, tlawmngaihna, aia upa zahna chawinung tu, tanpui ngaite tanpuia, hmeithai, chhumchhia leh rethei te ngaihsaktu YMA chu Mizo mipui zawng zawng, Party hrang hrang pawh sawi lova inlungrual leh inngeih taka an awm khawmna a ni tih sawiin Home Minister chuan pawl thenkhat ten YMA din an khap hian sorkar thinlung  a deng a, Mizo mipui te thinlung a deng na hle a ni, a ti a. Mizoram sorkar chuan Autonomous District Council emaw, hetiang lam diltu te reng reng a thlawp dawn lo a, khawi bialah mah sorkarin Autonomous District Council  pek tumna a neilo, a ti. Pu R.Lalzirliana chuan mi thenkhat kawhmawh bawl tlemte te thil tih avang hian hnam bik anga tumah a hranga en tur an ni lo, a ti a.  Mizoram sorkar leh mipui te tibuai zawnga khawsa lui tlatte erawh chu sorkarin ngaihtheih loh chin a la nei ngei ang tiin Mizo hnahthlak hnam hrang hrang te chu unau kan nih anga inngeih tlang taka khawsak hi sorkarin a duh ber a ni, Home Minister chuan a ti.

Pu R.Lalzirliana chuan a bial chhung Keifang leh Saitual a sorkar hmalakna thenkhat tarlangin June thla bul lamah Saitual Higher Secondary School compound-ah khum 100 awm theihna tur Girls Hostel lungphum phum a nih tur thu te, Keifanga  Girls Hostel sakna tur Tender tihchhuah a nih tawh thu leh hun reiloteah sak tan a nih tur thu te ,  Keifang khaw chawmtu tur Tuivawl atanga tui pump chhohna tur pawh sanction vaibelchhe 20 chuang an hmuh tawh thu te, ruahmanna chak taka kalpui mek a nih thu te a sawi. NLUP chungchang pawh sawiin Home Minister chuan sawiseltu tam tak karah NLUP kal tlangin miharsa te rahbi tukna tur sum pek a ni a, hei hian  sorkarin thingtlanga cheng te a ngaihsakzia a tilang a ni, a ti bawk.

Keifang Venglai Hall hawnna inkhawmah hian Conservator of Forests Pu Lalthangliana Murray IFS chu khualzahawm a ni a, ramngaw humhalh a pawimawh zia leh hei hian mihring nunna leh hriselnaah nasa takin a nghawng a ni, a ti.

Keifang Venglai Hall, a dung 62 ft, a vang 30 ft hi March 2010 atanga sak tan niin Ministry of Tribal Affairs hnuaia Development Agency atanga sum hmuh cheng nuai 15 hmanga sak a ni. Hall hi tha taka sak a nih theih nan Village Council leh tlawmngai pawl hrang hrang te kaihhruaina hnuaiah Building Committee din a ni a. Sorkar atanga tanpuina sum an dawn bakah hnatlang tha tam tak sengin Hall hi kum hnih chhungin tha taka sak zawh a ni.

Pu R. Lalzirliana hian thuthleng vawnchhan neilo 50 leh vawnchhan nei 10 a pe a, Pu Lalthangliana Murray pawhin Dekchi lian leh no dozen 4 a pe a ni.