Thenzawl Sports Committee ina kum hnih dana buatsaih thin, Thenzawl Sports Festival 2012 chu nimin khan a kharna hun hman a ni a, Chief Minister Pu Lal Thanhawla chuan a hmanpui.

Chief Minister chuan Thenzawl sik leh sa hi infiammite leh police te tan training-na hmun tha leh pawimawh tak a ni a, infiamna hmunpui a ni thei dawn a ni a ti a. Mizoten kan hmingthanpui thin, hockey tihnun tharna kalpui mekah Thenzawl hi hmun pawimawh tak a ni dawn a, tuna Kawnpui hockey khelmuala astro turf phah mek bakah hmun dangah la siam zel a ni ang a ti. Thenzawla Golf Coursesiamtur chu ramdangmi local a, rawn en ten tha an ti hle a, DPR pawh central sorkarah thehluh a ni tawh a ni a ti..

Chief Minister chuan hmasawn tur kan nih chuan sorkar tanpui tlaka awm a ngai a ni a ti a. Thenzawl chu ram laili a awm, hmun rem tak anih avangin la thangduang tur a ni a, chuvangin hmathlir thui tak, kum 100 lo awm tur thlir chunga an ramte chu humhalh turin khaw mipuite chu a chah a. Mi lian leh thil ti theite hnena tiral lo tura ngenin, hmasawnna in a ken tel, project lian tak tak ten ram lei ngai lova an mamawh tur ang, ram, thing leh maute tha taka pe thei tura humhalh tlat turin a ngen a ni. 

Sports festival chhung hian sports discipline 12 ah YMA Branch angin leh a mimal (open) in inelna hi buatsaih a ni a, YMA Branch 7 ten inelna an nei a ni. Nimin a khar ni ah hian Football, Volleyball, intlansiak leh inhruipawh ah te final khelh a ni a. A pumpuia chak ber, champion chu Vengthlang YMA Branch niin point 218 an hmu a, pahnihna in point 177 hmuin, Field Veng YMA Branch in an la a, pathumna chu Bazar veng YMA Branch in lain point 145 an hmu a ni.

Chief Minister hi Pu C.L.Thangliana, Engineer-in-Chief, P&E leh Serchhip D.C. Pu P. Lalchhuanga ten an tawiawm a ni.