Vawiin tlai  khan Raj Bhavan-ah khawvel ram hrang 10 atanga lokal, India chhulchhuak thalai 39 ten Mizoram Governor Kummanam Rajasekharan an kawm. Vawiina Governor kawmtute hi India chhulchhuak ramdanga khua leh tui ni tawh te an ni a.  Ministry of External Affairs hmalakna pakhat,  Know India Programme(KIP) hnuaiah India ram hmun hrang hrang an rawn tlawh a ni.

Mizoram Governor Kummanam Rajasekharan chuan a inlengte chu Mizoram aiawhin a lo lawm a. India ram chu ram ropui bik, Unity in Diversity ataka kalpuitu, tawng hrang hrang hmangtute leh hnam hrang hrangte inlungrual taka an awm tlanna a ni a ti a. Youth of India Origin te pawh ramdang mi ni tawh hlawm mahse Hnamah chuan  Indian an nih reng tur thu te,  India ram pawh rawn tlawh thin tur te leh an awmna ram atana  mi tangkai ni theuh turin a chah a ni.

Ramdang atanga lokal, Youth of Indian Origin te chuan Governor an inkawmnaah hian India ram chu an hmuh tum aia ropui leh zau, a chhunga mi cheng te pawh mizia leh khawsak phung in anglo tak tak an ni an ti a. An thlahtute Indian an ni tak nain an hriatphak chi an pi leh pu te atanga India ram la hmu ngai lote an nih thu an sawi a. India ram hmun thenkhat an tlawh tawh tih sawiin Mizorama mi chengte chu an nelawm an tih thu sawiin Nghahloh Dawr Hmuifang an panna kawnga mi an hmu chu rinawmna kawngah  thil entawn tlak tak a ni an ti.

Indian Origin thalaite Guyana,  Suriname, Israel, Fiji, Mauritius, South Africa, Trinidad & Tobago, Myanmar, Sri Lanka leh South Africa atanga lo kal te an ni a. Aizawl chhevel hmun hrang hrangte fan kual pui an ni tawh a, Zirlai leh zirtirtute nen inkawmna te pawh nei tawhin zaninah aijal Club-ah Cultural Programme buatsaih sak an ni dawn a. Naktuk hian Mizoram an chhuahsan leh dawn a ni.